La primera feira de livros Sefardi en New York

Dora NİYEGO Judeo-Espanyol
28 Temmuz 2010 Çarşamba

(Komo no topi dinguna novela sovre komo se paso la primera feira de livros sefaradi en New York, me desidi de eskrivir sovre este evento, de lo ke meldi en las publikasiones antes del 25 de Julio).

Organizada por la Federasion Sefaradi Amerikana, la primera feira de livros sefaradi en New York, va tomar lugar en el 25 de Julio en el Salon Steinberg del Sentro de la İstoria de los Judios, kon lekturas de livros, firmas de eskridores, ventas de livros, i vijitas al mundo sefaradi.

La feira va reunir los eskridores i los amantes de estos livros sovre la kultura, istoria, filozofia, tradisiones relijiozas, idiomas i eksperiensas de los judios sefaradis del pasado i de oy. Eskridores ke se espesializaron sovre temas sefaradis vana pueder tambien vender sus livros. Sienes de livros muevos, viejos, i los ke son difisil de topar vana ser dispansable a la venta por la Libreria de la Kaza Sefaradi. Los eskridores i los amantes del mundo sefaradi tambien vana tener la posibilidad de diskutar sovre siertas temas sefaradi.  El enterlokutor de este diya va ser el Rabino Marc D.Angel, ke es el fondador del İnstituto de ideas i ideales judias, i el Rabino de la Kongresion Shaerth İsrael ke es la mas vieja kongresion de la Amerika del norte. El rabino Angel va avlar sovre los fandamentos de la Espiritualidad, sovre Maimonides, Spinoza, i otros filozofes.

El program va ampesar a las dodje de la media noche del 24 de julio. Jean Naggar va meldar sus memorias de Ejipto, beviendo de la agua de la riviera Nilo. Mas duspues Marc Klagman ke es el profesor de Muzikolojia judia en el Hebrew College Union, va meldar pasajes de su livro ‘Magam y Liturgia’ ke resivio un premio espesial. Este livro es sovre los rituales, muzika i estetika de los judios de Siria ke estan biviendo agora en Brooklyn. Andree Aelion Brooks va meldar i diskutar la vida de un bankero sefaradi, i la vida i la ovra de Dona Gracia Nasi. Penina Schram ke es profesora de Teatro en en la Universidad Yeshiva, va kontar una istoria sefaradi i tambien kuentos folklorikos. Mara Cohen, profesora de la Universidad Estatal de Missouri, va meldar un kuento sovre los judios romaniotes, de su livro, ‘Un Grito en el Sol’. Jessica Jiji va meldar de su livro, ‘Sweet Fechas en Basora’, ke es una istoria de amistad i de una famiya ke biviyan en İrak en la Segunda Gerra Mondial. Abraham Sutton va meldar de un livro sovre su padre, el famozo Hillel Menashe Sutton, uno de los presnsipales miembros de la komunidad sefaradi en Aleppo, Siria, i Yerushalaim. Profesor Daniel Khazzoom va meldar de su livro ‘No Way Back’, ke konta el viaje de un judio de Bagdad. El enterlokutor dalkavo va ser James Mitchell Kaplan. Kaplan va kontar la istoria eskrita sovre las mujeres i los ombres judios arastando en los fuegos i las aguas, durante la Engizision i la Ekspulsion de Espanya en el anyo 1492.

En la feira, los partisipantes vana pueder topar tambien topar muy viejos livros, volumes antikos en ladino i en ebreo, de Salonika, Livorno, Tunez, Venezia i Yerushalaim.

Una seleksion de livros ralos de la Biblioteka i Archivas de la ASF vana estar en la egzebision. El Muzeo de la a Universidad Yeshiva aparejo tures a estas ekspozisiones ke se yama ‘Un viaje a los mundos judio’.

La Colleccion Braginsky es una koleksion eksepsional de  manuskriptos en ebreo, eskritos a la mano, i livros emprimados en Hollanda, İtalia, Espanya, Gresia i İndia.

El koordinator de Projektos Espesiales en ASF, Shelomo Alfassa, se esta okupando del program del diya.