E l diya de Santo Valentino empeso en la epoka del İmperio Romano. Debasho del governo del Emperor Claudio II, uvo munchas gerras i matansinas. Claudio el Kruelo tuvo munchas difikutades para unir los soldados i embiyarlos a las gerras. Claudio se penso ke los ombres no se kerian ir a gerreyar porke eyos no keriyan espartirsen de sus mujeres o de sus namoradas. Komo rezultado, Claudio kito una ley mueva diziendo ke no va aver mas dingun kazamiento o espozorio en Roma.
En la mezma epoka, aviya un papaz en Roma ke se yamava Santo Valentino. Santo Valentino estava kazando los mansevos en sekreto. Ma malorozamente, su sekreto fue deskuvrido i Santo Valentino fue asasinado. El diya ke Santo Valentino fue asasinado era el 14 Febrero del anyo 270.
El mezmo diya, antes de ir a la muerte, Santo Valentino desho una letra a la ija del gardian ke lo aviya ayudado en la prizion. En esta nota Valentino la remersio por su ayuda i por su amistad, i debasho de la letra eskrivio una nota ‘’El amor de tu Valentino’’.
Esta nota empeso el kostumbre de embiyar mesajes de amor en el diya de Santo Valentino. Kada anyo en este diya, todos se akodran de este evenemiento i se embiyan mesajes de amor, poemas i regalos de parte a parte. Este evenemiento amostro ke ‘’el amor nunka puede ser venkido (yenmek)’’.
Tu B’Av, el kinze del mez July, es ’el diya del amor’ en İsrael. Este diya es un diya de fiesta antika i moderna. En la elpoka del Segundo Templo, Tu B’Av era nombrado komo un diya de alegriya, i en akel diya, las mansevas se vistiyan fostanes blankos, i baylavan en las vinyas para topar novyos. Este diya se empeso a fiestar de muevo en el estado moderno de İsrael, en los anyos dalkavo.
En
Tu B’Av, komo las otras fiestas judias, empesa la noche del kinze del mez, ke es la noche de luna yena, en el kalendario lunar. En las kulturas antikas, la noche de la luna yena se viya komo una noche konveniente por la romansa, el amor i la fertilidad..
En los anyos dalkavo, en esta noche se apareja festivales de kantes i bayles, en İsrael. Los mansevos i las mansevas se visten de blanko, i la fiestan kon alegriya. Ma, este diya no es un diya de konje; es un diya de lavoro. Esta fiesta no es una fiesta relijioza komo las otras fiestas.
Tu B’Av es solo un kustumbre kedado de las kuturas antikas, i akeya noche se selebra kon alegriya i kon amor en el estado de İsrael.
