Noah

Rav Yeuda ADONİ Köşe Yazısı
30 Ekim 2008 Perşembe

El Kriyador enkomendo a Noah, de azer una arka, por razon de el deluvyo (mabul) ke iva traer a el mundo. İ fue enkomendado de parte el Kriyador de tomar a la arka dos pares de kada jenero de todas las Kriyansas bivas. İ de las Kuatropeas limpyas, a syete pares de kada jenero.

Noah izo el komando de el Kriyador, enpeso el deluvyo, kon furtuna i relampagos. Malgrado todo esto, la jente no pensaron a tornar i repintirsen de sus negras eças.

Noah i sus ijos cuntos sus mujeres entraron a la arka, enpeso el deluvyo fuerte ke se avyeron los syelos i los abismos de la tyera.

Estonses se rekojeron a el deredor de la arka munças personas pero, el de luvyo se mayorgo i se deperdyeron todos.

En este mismo diya enpeso las luvyas ke duro 40 diyas i 40 noçes. Asta ke suvyeron las aguas 15 pikos ensima de las montanyas. La arka iva nadando en la agua komo una nave fuerte.

150 diyas, kere dizir, dizde el enpesijo del deluvyo, fin el 17 Nisan, no se vido ningun Sinyal de tyera en el mundo, todo era Kuvrido de başo de las aguas. En el 17 Nisan se akodro el Kriyador de Noah, i de todo lo aviya kon el en la arka menguaron las aguas i pozo la arka en una de las montanyas de Ararat. Dizde este diya endelantre iva kada diya menguando las aguas, fin el primer diya de Tamuz ke abaşo la arka i se viyan las puntas de las montanyas. Pasando 40 diyas avyo Noah la ventana de la arka viyendo ke ya se enşuguo la tyera mando oel Kuerbo (Karga) a fuera de la arka. Ansi mando dos veses entervalo de 15 diyas a la palomba. Syendo la palomba ke mando ultimamente kuando no torno solyo Noah i su famiya de la arka. Salyendo Noah de la arka fraguo un mizbeah (ara) a nombre del Kriyador Ayego un korban en sinyal de agradesimyento al Kriyador.

El şemyitbarah resivyo kon plazer el buen rekonosimyento de Noah i prometyo por endelantre a un ke es enposivle sin aver pekadores en el mundo, ke la natura de la persona es negra dizde su nasimyento, kon todo no va destruir mas la tyera entera por las pekadores. El Kriyador lo bendişo a Noah i le enkomendo ke muçiguen i inçan la tyera.