Kuando la mueva administrasion va pasar al posto en unos kuantos diyas, un rekor de kuarenta i sinko judios vana djurar por sus muevos postos; trenta i dos judios en la Kamara de Reprezantantes, i tredje judios en el Senato.
De los tres muevos reprezantantes, el uno es un multimilioner empresario kon oriantasion omoseksual, el otro un ombre de politika de muncha eksperiensa, i el treser un avokato muy riko.
Jared Polis, un multimilioner empresario de İnternet de trenta i dos anyos, va ser el Reprezantante del Sigundo Distrikto de Colorado. El va ser el primer omoseksuel ke fue elijido a la Kamara de Reprezantantes.
Jared Polis izo su fortuna de dozyentas milion dolares kuando el era un mansevo de vente anyos. Nasido en Boulder, Polis lavoro por ‘Colorado State Board of Education’, i fondo BlueMountain.com, un siteo de kartas de felisitasiones i vendio este siteo, en el anyo 1999 kon grande profito. Jared tambien fondo i vendio el siteo floristo, Proflowers.com.
En los anyos dalkavo, Polis dediko la mas grande parte de su tiempo, a lavorar por ovras filantropikas, la mas grande parte por la edukasion de los mansevos.. En el anyo 2004, el fondo la ‘New America School’, una eskola ke ansenya la lingua ingleza, a los mansevos emigrantes. Asta el anyo ke pasimos, Polis lavoro komo el Direktor de esta eskola.
Polis, en estas eleksiones, gano una gerra dura, en la rejion Denver, ke es un grande Distrikto Demokratiko, i ke tiene una grande populasion judiya. Segun David Shneer, Direktor del Sentro de Estudios Judaikos en la Universitad de Colorado en Boulder, la populasion judiya de Denver pujo de kuarenta por sien, en los anyos dalkavo.
Polis gano las eleksiones, en tomando los votos de mas de sesenta por sien del puevlo. Jared Polis disho ke su relijion i su oriantasion seksual no djugaron dingun rolo durante la kampanya de las eleksiones. ‘La sola koza ke entereso el puevlo de muestro distrikto, fue la gerra en İrak, los problemas de salud i la edukasion de los mansevos’ disho Polis.
Polis es un miembro de la Komunita Judiya, Har Hashem. La Sinagoga Har Hashem es la sola Sinagoga Reformista de Boulder. El Grande Rabino de la Komunita, Deborah Bronstein (segun el nombre, deve de ser una mujer), disho ke Jared Polis, da grande emportansa a las valores judias. ‘El lavora kon grande entuziazmo en las organizasiones judiyas, sin asperar dingun profito’.
John Adler, el muevo Reprezantante del treser Distrikto de New Jersey, tiene una eksperiensa de vente anyos en la politika. Adler es el primer Demokrat ke gano este posto, desde el anyo 1882. John Adler paso dizisesh anyos en el Senato del Estado de New Jersey, ande el fue Lider Asistente de la Minorita entre los anyos 1994 i 2001. Dagora endelantre, los rezidantes del Distrikto New Jersey vana tener komo reprezantante un korajozo defendente de İsrael. Adler lavoro en ‘New Jersey-İsrael Commission’, una komisyon ke se okupa de las relasiones komersial i kultural entre los dos estados. En este posto, Adler gano una reputasion komo Prezidente del Komite de Juzgo.
Adler esta dizyendo, ke el va dar toda su fuersa para ayudar las famiyas de la klasa media, para ke puedan gerreyar kon las kondisyones duras del diya. Esto fue el mas emportante tema de su kampanya de eleksiones. ‘Esto es la primera vez desde la Grande Depresion, ke la klasa media peryo su pueder’ esta dizyendo Adler.
En el ochen Dstrikto de Florida, Alan Grayson, gano el posto de Reprezantante de Orlando. Nasido en Bronx, Grayson gasto mas de dos milyon dolaras de sus paras, para ganar este posto. Komo es un grande avokato, Grayson dio al Djuzgo los reprezantantes del governo, los ke son responsable de defraudar (dolandirmak) los pagadores de impuesto (vergi), i de embiyar materiales defektivos a los soldados amerikanos en İrak.
