Komo todos lo savemos, este anyo es el sesentien aniversario de Israel. Los Israelianos estan kontente ma sobrio (ağırbasli). Es una grande maravia por Israel a arivar al sesentien anyo. Si komparamos la realitad ke los primeros emigrantes se konfrontaron en el anyo 1948, kon el estado de Israel de oy, vemos ke el grande trokamiento es un mirakulo. El pais troko muncho, una mueva jenerasion kresyo aya, i en sesenta anyos, tres miliones de muevos emigrantes entraron a Israel.
Aunke ay tantas grandes differensias, Israel dainda esta en el empesijo de su kamino. Den diya en diya, sus enemigos estan pujando i estan penando mas por su destruksion. Tambien el estado sosio-ekonomiko de la sosiedad no se aresento dainda. Oy, Israel es parte del globo ekonomiko i esta en una transformasion kontinual.
Las relasiones de Israel kon los judios del mundo entero, estan tambien, en el punto de empesijo. Komparando a la vieja jenerasion, la mueva jenerasion de Israel esta mas ındıvıdualista, mas libra i mas anti-enstalada. Ma el ideal de los mansevos no troko.
El pais troko de munchas maneras. La sensia de kompudar ramplaso la agrikultura. Ma la brega (mucadele) no troko. Oy Israel tiene menester de mas muncho saverisyo i de mas munchos komputadores komo teniya menester de mas munchos materieles de agrikultura en los 1950s.
Mas no se esta establisando muevos kibutzes en Galilea, ma en lugar de esto, el estado esta ayudando a las chikas i medianas empresas (girisim) para garantizar sus devdas ke es menester para kreser la vida ekonomika, developar el norte de Israel i azerlo mas bivable.
Los vilajios de la Ajansia Judiya establisados para salvar los mansevos de la Alemanya Nazi en los 1940s, oy, estan prokurando nido por los mansevos en situasion de risko. La definision de ‘’risko’’ troko muncho en los anyos dalkavo. Ma el kontorno ke prokuro proteksion a los trezientas mil mansevos no troko del todo en sesenta anyos.
Kon el trokamiento en el pais i el trokamiento en la brega, Israel esta en las puntas de grandes riskos i de grandes okaziones.
Uno de los elementos ke mos sustenio en los sesenta anyos ke deshimos atras, i ke mos va sustenar en los sesenta anyos ke tenemos adelantre, es, el anyudo ke ata al puevlo judio.
Kuando Israel esta ferrido, los judios del mundo entero se sienten ferridos. Kuando los roketes kayeron en el norte de Israel, judios del mundo entero vinyeron por ayuda. Los refujios fueron aparejados kon aire kondisionado i kon televizyones i los mansevos fueron yevados a los kampos afuera del terreno de fuego.
Kuando los roketes kayeron a Sderot, los judios de la Amerika del Norte estavan aya para prokurar kazas a los ke perieron sus kazas i para embiyar los mansevos a los kampos afuera del terrano de ataka. Ansi los mansevos puedieron azer la fiesta Pesah.
Ay diez anyos ke este anyudo entre las sukuenta komunidades judias del mundo i entre Israel esta kontinuando i va kontinuar en las muevas jenerasiones. El viejo primer ministro Ariel Sharon empeso un programa por los mansevos judios del mundo entero. Kada mansevo deve de vinir a Israel i pasar aya, a lo manko un anyo, para konoser el pais. Para kada dolar ke va kontribuar kada judio, el estado va kontribuar un dolar, i ansi, se esta arekojiendo la moneda neseserio por este proje. Ken puede saver el futuro; los futures lideres de Israel pueden salir entre estos mansevos.
Los judios del mundo entero kale ke lavoren dopio para konsolidar i enfuerteser los stratejikos i los anyudos entre el puevlo judio. Si reushen a azer esto, kon un dopio eforso, imajina el grande trokamiento en Israel en los sesenta anyos ke tenemos adelantre.
