METSORA

Rav Yeuda ADONİ Köşe Yazısı
9 Nisan 2008 Çarşamba

La peraşa de Metsora nos enbeza lo bueno ke trae a la persona la avla buena de entremeterse la persona kon palavras de ley i mitsvot. La persona tyene paga buena  del kriyador. Ma la kontra si se auzo la persona avlar laşon ara, palavras non buenas i de raportor palavras ke va traer danyo a su serkano a su amigo. La pena es muy fuerte.

El verseto dize la vida i la muerte esta dekolgado en la alguenga. Si enpleya la persona su avla para buena alargo su vida, si no malorozamente aze danyo a su vida, a su salud. Sontrae a si mezmo angustya i el bierva Tsaraat -Lepra- ke es el nombre de la peraşa “Metsora” lo eksplikan muestros savyos, Motsi Şem ra el ke kita fama mala. Kere dizir el ke kita fama mala por su serkano se apena kon la yaşa de lepra -Metsora-. El ke avla laşon ara kere dizir mal por su haver, kavza danyo a si mismo ke se apena porke avlo mal. Kavza danyo a la persona ke por el avlo mal. Dizen muestros savyos  kon la espara se puede dar fin a la vida de la persona ke esta serka de su inimgo, ma kon la alguenga puede... matar kere dizir puede denyar a alguna persona malgrado ke esta leşos de el. Laşon ora avlar mal entre en un grupo de pekados fuertes komo avoda zara sirvir idoloz, i vertir sangre. Miryam la ermana de Moşe Rabenu se apeno kon yagas de lepre solo por ke avlo por Meşo Rabenu. Ke se separo de su mujer despues ke devino profeta. De este kavzo puedemoz entender ke karar de grande es la pena da este defekto.

Un leprozo metsora es ovligado de traer doz paşaros por korban  a el santuvaryo despues ke se milizino.

Dize el kriyador komo los paşaros çuçulean kon sus bokaz ansi, perdonan estos paşarikos a akeya persona ke no se pudo detener su boka de avlar mal por su proksimo.

La peraşa nos konta dizyendo: Si la persona vido algunas yagaz en las paredes de su kaza deve de amostrarlos a el Koen. El Talmud dize: La kavza de mançarse una kaza kon yagas es por akeyas personas ke pensan ke todo apartyene a si mezmo i no enpresta ninguna koza a ningunos.

Komo el kuerpo de la persona puede tener algunos hazinuras, ansi la alma de la persona sufriye de diferentes hazinuras i se deve de milizinarse. Komo dize David Ameleh, Refaa nafşi ki hatati loh milizina mi alma porke piki kontra ti. David Ameleh dize: Sinyor del mundo milizina mi alma no seya ke piki i kavzi mal i hazinura sovre mi. Las angustyas ke vyenen sovre la persona deve de azerlo pensar, ke son las defektos suyas i de tornar en Teşuva sovre sus pikados.

El Koen aziya esforsos de azer perdonar seya por el pekado de avlar mal (Laşon Ara) i por el pekado de orgolyo -(Gaava) ansi akeya persona ke yo fue perdonado se milizinava su alma i sus sintimyentos.

En la peraşa meldamos dizyendo: Vozvo adar nega tsaraat lepra en vuestras kazas. Kere dizir si no estaş korektos verso dyos i verso la cente el Şem Yitbarah vos va adar im sinyal antez de apenar vuestros kuerpos. Si somos entendidos de pueder entender nuestras yerros i tornar a el kamino dereço lo mas presto posivle bien aventurados seremos nozotros i tendremos munço bueno.