Despues de mueve diyas de vakansas

Silvyo OVADYA Köşe Yazısı
29 Ağustos 2018 Çarşamba

En Turkiya, ke es un payis de majorita muzulmana, las dos fiestas de Ramadan i del kodrero o del kurban son las dos semanas ke el Şalom da un OFF a su publikasyon. Puedesh meldar el Şalom 50 vezes al anyo. Solo las dos fiestas relijiozas son las vakansas de muestros kolegos i kolegas (meslektaş).

Esta vez lo tomimos por la kola porke lunes era arba de mued (arife), martes, mierkoles, jueves i viernes, los kuatro dias del bayram. Tuvimos la oportunidad de estar kon mi ija i inyeta ke biven en Londra ma komo mi inyeta teniya un problem kon su pasaporto italyano, vinyeron a Estanbol para pueder tomar un muevo pasaporto. I mozotros tuvimos el plazer de estar endjuntos kon eyas dos semanas.

Estava muy ermozo de ir a la Isla Sedef ke es la sinkena i la mas chika isla ande se mora. En esta isla se topa una plaj i dos “beach”es. Kualo es la diferensia entre una plaj i un “beach”. “Beach” vyene del inglez. Los lugares para espandirse son mas konfortavles. Se kome i se beve mas chik i mas karo. Kuando esta muy kaynte i tenesh ser (susamak) puedesh bever un gin tonic, una kupa de votka kon oranjad o una kupa de shampanya (Moer Chandon, Mumm o otras markas). Vos van a dar tovajas ke son en kolores diferentes. Devesh de meter orejeras (kulaklık) para no ensodreservos. Ma tenesh la posibilidad de ser kon una djentorya mas shik. Esto no es una moda de Estanbol. Bodrum, Çeşme i Alaçatı son los primeros a realizar este modo de plajes ke no puedesh topar mizmo en Saint Tropez ke es el lugar el mas sosietik del mundo.

 Mi ijo en el empesijo del enverano se fue a la Universidad Koç para un kurso de enverano. I kuando eskaparon diya de viernes se kedaron en la universidad para irsen el diya despues a una plaj (beach) en Kilyos. Kuando vino a kaza le demandi komo paso la plaj. I me disho ke alkilaron (kiralamak) una lodja kon jakuzi. Eran mas de dodje personas para emplear esta lodja. Un presyo loko, ma vos estan dando dos bokales de Vodka Absolut (la mijor marka)! Agora estan aziendo todo modo de lokuras para ganar paras.

  Kuando tornimos de la Isla Sedef, la Büyükada estava yena para patladear ma mos disheron ke jueves va ser mas mal porke es el diya de los tures turistikos, lo mas muncho para los arabos.

 Jueves a la tadre estavamos envitados a la isla de Burgaz i deviamos de tomar el vapor de las sinko i medya ma malorozamente el vapor se incho media ora antes. I metyeron otros dos vapores. Mi mujer se arepintyo de este plazer i me disho “Ketana por sehora”. Kijimos alkilar (kiralamak) un taksi de mar ma el kapitan no estava. I dospues de una ora i medya suvimos a un vapor kon miles de personas. I kuando vinimos a la isla de Burgaz, mi mujer bezo la tyerra porke fue un mirakolo de ayegar (ulaşmak) sin ke el vapor se unde (batsın). Ya pudesh ver en las photos la desgrasya.

 El evenimyento el mas emportante en las islas fue el konsyerto organizado por la Keila de Büyükada kon İzzet Bana, Cenk Rofe, Ediz Bahar i Yusuf Sağlamlar. Mizmo las Estreyikas d’Estanbol tomaron shena en este evenimyento.

 Kreo ke estos konsyertos van a ser tradisyonal (geleneksel) en los anyos sigientes.

 Lunes para siertos kon los mokos enkolgados para otros yeno de felisidad (mutluluk) porke van a empesar a lavorar mos fuimos al echo. I el trafik estava kalmo porke kreo ke munchas personas devian de repozarsen dospues de mueve dias de vakansas!