Era diya de djueves a la tadre ke organizimos un konsyerto del koro Nes formado de las mujeres de muestra komunidad. Entre eyas unas kuantas tyenen un talento remarkavle. Demandi a İzzet kuantos miembros ay en el koro. I me disho ke agora tenemos serka de trenta almas, mizmo si todas no estan dainda prontas. Reelmente devo de felisitar İzzet por su lavoro i por su pasensya. Es djusto ke es mas fasil de azer este echo kon las mujeres ke kon las kriyaturas. Porke kreo ke todas las dammas estan patisipando kon grande dezeo i gana...
Las kriaturas son muy difisiles. Mizmo si İzzet tyene un grande talento para pueder ensenyar a las kriyaturas no es muy fasil de pueder realizarlo.
I las dammas mos dyeron un resital de una ora i dyes puntos ke fue reelmente apresiado por el publiko.
Aviya kantikas en judeo-espanyol (siguro), en ebreo (no era din en un klub asemejante), kantes liturjikos, ke son muy enteresantes para el publiko.
Es djusto ke İzzet dyo syertas eksplikasyones sovre la muzika i los sujetos ma kreo ke no era bastante.
Los ke asistyeron tenian de menester de mas munchas eksplikasyones.
Las 16 dammas ke partisiparon estavan muy kontentes de prezentar sus musika a un publiko de mas de 250 personas.
Las kero rengrasyar por sus esforsos. Esti Saul ke bive en Bodrum en enverano no penso ni dos vezes antes de vinir a este konsyerto. Desho su marido, vino al konsyerto i torno atras! Bravo a todas estas dammas!
