Ke modo de komportamiento

Silvyo OVADYA Köşe Yazısı
25 Temmuz 2018 Çarşamba

Dspues de la media elektronika, las personas no son muy korrektas komo eran vente / trenta anyos antes. Porke es muy fasil de eskrivir un artikolo metiendo entre tanta koza un alay de kifures i negras palavras para azer parte de la opozisyon. Malorozamente en los medios elektronikos se topa muncho materiel antisemitiko. I mi opinion es de responder – si es de menester - kon unas kuantas palavras ma sin insultar los ke eskrivyeron. Los anyos dalkavo tenemos syertas personas ke no biven en muestreo payis i la mas grande partida moran en Israel İ estan eskrivyendo artikolos en la media elektronika ensultando mizmo syertas personas politikas ma no tyenen el koraje de meter en el teksto el lugar ande biven. De ke esta birra? No es muy kolay de entender de ke esta djente estan tan furiozos kontra el payis ke nasyeron i ande se engrandesyeron. No puedemos dizir ke se estan selando del modo de vida de los djudios turkanos porke la vida es mas kolay en Israel ke en Turkiya. Ya savemos ke si dos personas lavoran kon un minimum de ganansya ganan mas de onzemil shekeles ke no es muy kolay de ganar estas paras en muestro payis. Ya se ke Israel es muncho mas karo ke la Turkiya ma las kondisyones no estan tan difisil para los ke pueden lavorar en Israel.

  No kreo ke munchos de entre eyos tuvyeron siertos atakes antisemitikos! No vos esto dizyendo ke no ay antisemitizmo en Turkiya. Es djusto ke en primero en la prensa tenemos munchos jurnalistos ke eskriven kontra Israel i adjustan siertas kozas kontra los djudios.

   Ayer la noche teniyamos una seduta de los diridjentes de muestra komunidad i me ambezi ke tenemos dodje kavzos diferentes ke se estan tratando en el tribunal (mahkeme). Reelmente kale apresiar estos diridjentes ke estan luchando kontra el antisemitismo sin espanto. Porke mismo si es una asosyasyon o una fondasyon ke esta kontra lo ke fue eskrito kale una o dos personas ke reprezentan estas fondasyones o asosyasyones.

  Los ke son birrozos kontra la Turkiya i kontra los Turkos estan azyendo yerro, porke estamos en una situasyon mas difisil kuando estan ensultando siertas personas. Kreo ke el Itahdut Yotsei Turkiya (Türkiyeliler Birliği) no esta de este avizo.

  Para eskapar mi artikolo, kero anunsiar una otra vez ke amanyana jueves a las 19.00 en el Klub Anadolu en la isla de Büyükada vamos a tener un konsierto del koro Nes, enkavesado por el sinyor İzzet Bana. Mizmo si no sosh miembros del Klub tenesh la posibilidad de segir el konsierto.