Beaaloteha

Rav Yeuda ADONİ Köşe Yazısı
30 Mayıs 2018 Çarşamba

Salyendo el puevlo del dizyerto de Sinay i entrando al dizyerto de Paran enmedyo el kamino ke turo tres diyas, vyendo ke entraron a un dizyerto temerozo, leshos de lugares de morados de djente, se enpesaron a keshar, topavan ke avlar kontra. Bushkavan razones i achakes para kada koza i koza. Ma el Kriyador ke todo oye i todo save, ya sintyo sus malos pensamyentos i le dezplazyo muncho.

El puevlo arivando a el lugar nombrado Kivrot Ataava, la djente ajena ke estavan kon eyos (erev rav) dezearon unas kozas afuera del menester, kozas ke no se puedian toparsen mas ke en las sivdades, i no en el dizyerto i el puevlo judyo sin apartar i saver la diferensya ke ay de eyos a esta djente, tomaron i eyos a yorar dizyendo: Ken mos dyera a komer karne? I se empesaron a rekordar de munchas kozas de muy poka emportansa ke tenian en el Ejipto debaldes myentres ke el mantenimyento ke teniyan en la mano, ke es la magna, era una koza muy estimada en su savor i en su vista, i en su limpyeza. Tenyendo esto en mano no kaliya pensar por unas kozas de muy poka emportansa.

Se rekojeron, kada uno en la puerta de su tyenda, famiyas enteras a yorar por este mal ke las manka todos estas kozas ke teniyan en Misrayim kon abondansa. La verdad ke esta koza le desplazyo muncho a el Todo Poderozo, komo echaron tan presto sus buendades detras de la espalda.

Moshe Rabenu sintyendo estas todas palavras de el puevlo, se kesha kon el Todo Poderozo dizyendo, “ke pekados tuve ke me dates esta karga tan pezgada. Kaje ke no puedo suportar”. El Kriyador le enkomenda a Moshe Rabenu ke eskojga 70 personas de los savyos de el puevlo ke son kompetentes por giyar a el puevlo i el Kriyador les va dar fuersa ke rijan el puevlo i ke le alivyanen el yugo de Moshe Rabenu. I Moshe Rabenu rekonto a el puevlo el orden del Todo Poderozo i eskojo 70 personas de los savyos de el puevlo.