EMOR

Rav Yeuda ADONİ Köşe Yazısı
3 Mayıs 2018 Perşembe

La perasha EMOR nos da a entender la enkomendansa de santefikar el nombre de el Kriyador. Kidush Ashem komo esta dicho: No esbivles el nombre de una santedad, i sera santefikado entre el puevlo djudyo. Esta enkomendansa es una mitsva ke devemos afirmar todos en kada momento. El savyo grande “Arambam” dize: tener la kreyensa en el Kriyador, i esperar todo de El, es santefikar su nombre.

En la Bibliya meldamos, Hananya, Mishrael i Azarya, los amigos de Daniel fueron echados a el fuego, por el nombre grande del Kriyador, i fueron salvados kon los milagros ke izo el Santo Bendicho el.

Tambien la perasha trata por la santedad de los Koanim. Los Koanim no se deven enkonarsen en ninguna manera. El puevlo deven de onorar i santefikar a los Koanim. Komo lo vemos en la alaha, eyos deven suvir los primeros a la Tora, kuando egzistiya el santuvaryo, los primeras frutos de kampos i vinyas, los primeros frutos de las ovejas. Ansi ke el Koen Gadol deviya ser amigo i ermano de todo el puevlo.

Tambien en la perasha meldamos detalyos tokante las fyestas djudiyas.

Diya de Kipur es diya de perdonansa para la nasyon djudiya. Tokante a el diya de Kipur dizen nuestros savyos si alguna persona pensa de pekar anyo entero i ke Kipur el ya va ser perdonado, siguramente se yerra. Si no ke deve de arepintirse i azer teshuva i deshar su pekado i no repetarlo.

El Kriyador es piadozo; El se apiada de sus kriyansas i El nos perdona malas kulpas ke akometimos verso nuestros amigos o keridos o verso alguna persona. Devemos de demandar pardon ke nos perdonen, estonses nos perdona el Kriyador.

Tokante la fyesta de Sukot, ansi lo meldamos en la Tora, syete diyas deves de morar en las kavanyas (Sukot) por ke sepan vuestros ijos ke en las kavanyas (Sukot) vos ize morar kuando vos kiti de Mistrayim. Moshe Rabenu ekspliko en la Tora ke kada fyesta i fyesta de aki nos enbezamos ke se deve de repetar i avlar las reglas, la estorya i los kustumbres (uzos) de kada fyesta en su tyempo. Tambien la perasha kontinua diyas ke es syete semanas de kontar de Pesah asta Shavuot.

Los Koanim son los ke aserkan a el puevlo verso el Kriyador. Los korbanot, los sakrifisyos enaltesen a el puevlo. El dover de los Koanim en el tyempo ke egzistiya el santuvaryo era tambien de edukar a el puevlo, i arelumbrar a el puevlo kon la luz de la Tora.