Steven Spielberg en un Muzikal por la primera vez WEST SIDE STORY

Un filmo de los anyos 1961, WESTSIDE STORY, la ovra maestra lejendaria de sinematografia, se va meter en shena por el rejisor/senaristo amerikano Steven Spielberg i Tony Kushner.

Steven Spielberg en un Muzikal por la primera vez WEST SIDE STORY

El filmo de los anyos 1960, West Side Story, es una ovra maestra de sinematografia. Nasio en las kayes de New York i revolusiono Broadway. Supo darmos sentimientos luzios a dekrochar la luna en akeyos anyos ke eramos “teenagers”.

La ovra de ROBERT WEISS (senaristo), JEROME ROBINS (koreografo) i LEONARD BERNSTEIN (kompozitor) fue la gloria de HOLLYWOOD.

Resivio 10 Premios Oscar de Akademia.

El amor de Maria (Natalie Wood) kon Tony (Richard Beymer); el bayle de Rita Moreno i George Chakiris mos ofresieron una grande opera kontemporanea amerikana.

Desde akeyos anyos la reputasion del filmo kontinua sin interupsion.

Malgrado ke dinguna komemorasion no fue prevista en los Estados Unidos, los Fransesez eyos metieron en sena el 20 de Novembre 2007, una segunda version de West Side Story, un remake ke aparesio en Paris en la sena del teatro LE CHATELET, por los 50 anyos de la egzistensia del filmo reputado.

Pude meldar en el L’EXPRESS, hebdomadario fransez, las kritikas de arte:

Aparesen en la sena 53 bayladores i 26 muzisienes, peleyandosen, baylando i kantando. El ritmo enerjiko del rock i de la reproduksion asemeja muncho a la version sinematografika. Irlandezos i Portorikanos fueron remplasados por otros puevlos.

Se remarka poko dialogo, el rock, la muzika klasika, el jazz, el mambo, las notas muzikales irrezistivles del famozo kompozitor LEONARD BERSTEIN: AMERICA, COOL, TONIGHT, I FEEL PRETTY, ets., se kanto i baylo debasho de las mizmas eskaleras, abashando los eskalones.

Reputado ansi ke Cecil B. DeMille ke debuto en PARAMOUNT STUDIO i deskuvrio Hollywood para sinyar los filmos “Samson i Dalila”, “Los Diez Komandamientos”.... Asperamos kon impasensia esta produksion del famozo rejisor.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın