El Orno de Matza en la Olanda

El Orno de Matza en la Olanda

Keridas i Keridos,

Komo estamos dainda en los dias de Pesah, desidi de kontarvos sovre un orno/fabrika de matza ke se topa en la Olanda.

Para la mayoriya de los ornos de matza, Pesah es el solo periodo de ganansya ke tienen en el anyo entero. Dospues de la fiesta de 8 dias de Pesah ke kuando los djudyos konsumen matza para akodrarsen de sus ansestros ke fuyeron de la afrisyon de Ayifto, la demanda i la vendidad de este famozo “kraker” se eskapa. Ma solo en la Olanda no se eskapa, se vende anyo entero en los supermarketes porke los non-djudyos preferan komer matza en el dezayuno al lugar de pan.

Pieter Heijs i Udo Karsemeijer son los dos non-djudyos proprietarios del orno ke se yama “Hollandia”. Kuatro semanas antes de Pesah empesa la orniya de las matzas kasher. I sigun eyos dizen ke la matza kasher kosta muncho mas karo ke la matza ke no es kasher.

Malgrado ke en Pesah no ganan komo se gana en los otros tyempos, eyos kontinuan a ornar. Kada anyo kaji ke ornan serka de 40 milyones de plakas i una chika kantidad de matza shemurah.

I deke se vende anyo entero ayi? Porke la matza es konsiderada komo un alimento saludozo, porke es un produkto puro donde no tyene dingun adjustamyento, i es konsiderado de alta valor nutritivo (besleyici). Mas kualo se demanda de un produkto tan limpyo? El orno “Hollandia” eksporta sus produktos a la Skandinavya, a la Almanya i a la Fransiya.

Esta fabrika se aviya fundido en el anyo 1924, antes de la Sigunda Gerra Mundial por una famiya djudia de nombre Woudstra. Kuando vino el nazizmo, esta famiya fue ovligada de serrar las puertas i eskondersen. Dospues de la gerra, la fabrika se avrio de muevo i empeso a lavorar. En este entervalo malorozamente los 75 por syen de la populasyon djudia Olandeza mas no egzistiya.

La matza ke se vende agora son enpaketadas en kutis de karton de kolor de narandja (turuncu) para ke se apersiva al instante (hemen) al ver. Los proprietarios dizen ke fabrikar matza dospues de la gerra fue muy pratik porke no se kijo ni guevo, ni sal, ni asukuar ke aviya muncha mankura de esto. Lo ke se keriya era solo agua i arina.

Heijs ke agora tyene 55 anyos dize ke se akodra muy biyen de su chikes kuando komiya matza kon shokola i manteka. Aun ke Heijs no es djudyo, el konsidera la matza komo muncho mas ke un produkto de merkansiya. Dospues de tantos anyos, por siguro ke izo munchas amistades kon munchos djudyos. Este anyo iva asistir a su primera sena de Seder endjuntos kon su mujer en la envitasyon de una komunidad djudia Olandeza. En Olanda, matza es parte de la vida i istorya de Olanda.

Al vermos kon salud, alegriya i repozo.

Nota: Es traduizado de un artikolo eskrito por Cnaan Liphshiz en Jewish Telegraphic Agency (JTA)

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın