Repozo de Korason

Repozo de Korason

Los dias pasados meldi un livriko de rekomendansyas. Me plazyo muncho i vos kero eskrivir un poko sovre este livro.

Si es ke keresh estar kon repozo de korason no vos mirikiyesh por kozikas chikas porke veramente estas kozikas son chikas dize el ekrivante Dr. Richard Carlson en su livro ke vendyo mas de 6 milyones solo en Los Estados Unidos. Ansi dize el (en rezume):

Kuando resivimos nuvelas ke no mos plazen u ke rankontramos personas ke mos tyenen deziluzyonado, pishin amostramos reaksyones dezagreables, engrandesemos el evenimyento i abrasamos los aspektos negativos de la vida. Inyervarse, enkyetarse, enfasyarse kon fasilidad al deredor mos aze atar muestros brasos i manos i mos mete obstaklos para lo ke dezeyamos i azemos enfasyar a la djente ke mos kereran ayudar. Komo lo ke parese ke tenemos muncha adjile de alkansar a una koza u lo ke parese ke todo lo muestro es muy emportante. I ansi pasamos el tyempo en vaziyo a topar solusyones a los malores. Despues de un tyempo mos parese ke todo es la fin del mundo. Ma en este entervalo no mos damos kuento ke de si para si ya se topa una solusyon muy fasilmente. Para bivir en armoniya no kale inyervarse por las kozikas chikas porke kale pensar ke son veramente muy chikas.

Bien siguro ke pensando de esta manera la vida no se aze perfekta ma a lo manko se suporta.

Abasho vash a topar unas kuantas de estas rekomendensiyas: Mira ver de ser mas miserikordiyozo (merhametli). No kortes la palavra de dingunos. Aze buendad i no lo kontes a dingunos, desha ke kede sekreto en ti. Gozate el momento donde estas. Mira ver de ser pasensyozo i de ser el primer de dar la mano de paz i de amor. Demandate si el problem ke tyenes si va ser emportante despues de un anyo. I de vez en kuando un poko de estrecho es bueno, dunke ya te puedes estrecheyar un pokitiko. No te olvides de rengrasyar. Sonriyete a las personas mizmo si no las konoses. En primero miraver de entender al de enfrente i metete a su lugar. Aze buendad sin achakes i ten la uzansa de syempre azer buendad i de ser amavle. Ten kreensya en el Dio.  Kuando te syentes bueno rengrasya al Todo Poderozo. Aleshate de las obsesyones (saplantı). Toma un respiro grande antes de avlar. No penses ke la vida es un melodrama. Melda muncho i mira de ambezarte diferentes sujetos. Miraver de ser fleksible i de ser orozo kon lo ke tyenes i no kon lo ke dezeyas. Miraver de estar kontente en el lugar ke te topas. No te olvides ke todos tenemos manyizikas. Kalmate, kalma tu meoyo, amostra toleransya a la djente i mezmo a ti, i aksepta lo ke sos. No eches kulpa a la djente. Alevantate demprano, tomalo todo a la anchor. Ensembra plantas. Dize de ti para ti “i esto ya va pasar”. Inche tu vida kon amor i mira a tu echo.

Bive tu diya komo si fuera el dalkavo diya de tu vida i save tu valor.

Al vermos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın