La kariera artistika internasional de dos Polakos salvados del inferno Nazi

Un sovrebiviente, Wladyslaw Szpilman konta los anyos pasados en el geto de Varsovia. Un otro sovrebiviente, Roman Polanski desida de azer un filmo, El Pianisto.

La kariera artistika internasional de dos Polakos salvados del inferno Nazi

El 13 de Marso 1943, durante la likidasion del geto de Krakow, un joven apersive un grupo de ombres de su barrio, eskortado por los soldados Alemanes. Kuando se aserkan, el joven rekonose su padre entre los prizioneros.

Viene ojo a ojo kon el padre. Su mirada le murmura: “Fuyete!”

Esta shena figura en el livro: “ROMAN”, la otobiografia de Roman Polanski ke paresio en 1984. Unos detalyos serka de estos evenimientos se remarka en el filmo “PIANISTO” de Roman Polanski, sovre Wladyslaw Szpilman, prizionero del geto de Varsovia.

El relato fue editado en 1946, ma el poder de los Sovietes lo prohibio, durante medio siglo...

Enfin publikado en Fransia, puedemos entender la volunta de Polanski de kerer obtener los derechos. El Pianisto fue su proksimo filmo, komo savemos.

Szpilman mos desha la buena vida en 2000 en Varsovia. Por el muzisien, el livro uniko aparese komo una ovra postuma.

Ve sus parientes, sus dos ermanas i su ermano desapareser por siempre i ser gazados en TREBLINKA.

Unos kuantos dias mas tadre oye un ofisier nazi: “Mira, mira este treno yeno de judios. Los estan yevando para asarlos bivos...”

El muzisien joven ke oye el drama, se fuye solo en yorando. Se eskonde de un lugar al otro, en el geto, de novembre 1940 fina el mez de julio 1942.

Estas kondisiones estremesentes se pueden meldar en el livro “El Jurnal de Anne Frank”.

Despues de la gerra, el sovrenombre de Wladyslaw Szpilman era: “EL ROBINSON CRUSOE DE VARSOVIA”.

“Eskonderme i izolarme fue la kondision de mi salvasion”.

Deve su vida a la intervension de un Djusto: Wilm Hosenfeld ke murio a la fin de la Segunda Gerra i era prizionero de un kampo sovietiko.

Por Szpilman, ke se ambezo muy tadre la identita verdadera de la persona ke lo salvo, fue el drama mas grande de su egzistensia de sovrebiviente.

Nombrozas personas avlaron sovre las viktimas de la epoka funesta, maldicha.

NUNKA MAS...

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın