Komer kon gana i savor

Komer kon gana i savor

 

 

Oy vos kero kontar del bimbriyo ke es djusto la sezon de esta fruta presyoza i savroza. Es fruta i komida en mizmo tyempo. Me akodro ke en mi chikes, mi madre i mis nonas mos aziyan tifsinez de halva de bimbriyo i kyasikas de loap. En mizmo tyempo mi madre metiya kuartikos de bimbriyo kuando gizava tas kebap. Era komo una savor de patata dulse. Agora yo kuando gizo apyo meto i un bimbriyo kortado en revanadas ke da una savor maraviyoza al kaldo. Aparte de komida, de esta fruta se aze komposto, dulse, medyas al orno ke se ofrese kon kaymak, halva, loap i por siguro ke se kome krudo. Es una fruta muy saludoza. Estonses kuando no aviya madlenes, se ofresiya halva i loap a los musafires, kuando aviya alegriyas, fiestas, espozoryos, fashaduras i arekojimyentos de paryentes en las kazas i siguro en los fiksos. Esto era el esansyel komo dulsurya ke se ofresiya absolutamente.

El tyempo el mas delisyozo de la fruta es antes ke kayga la primera inyeve. Komo avli tanto de bimbriyo agora kale ke vos eskriva dos reseftikas de dulsurya para ke mos se aga todo dulse en la anyada ke vyene. Kada una de mozotros tenemos diferentes maneras de aparejar dulses i komidas ma mas o menos, las formulas se asemejan.

Empesare emprimero kon halva de bimbriyo i despues kontinuare kon loap ke es un chishit de jole (jöle) natural de fruta.

El materyel es bimbriyo, asukuar, limon i agua. Kaji 2 kilos de bimbriyo se munda la kashkara, se kita el korason de en medyo. Se mete a kozer kon agua. Kuando se ablanda se mete en un kolador, se esprime la agua de demaziya ke se guadra para el loap. Lo ke se ablando i se dezazyo i se izo pure kon un piron, se mezura. Para una kupa de pure es una kupa de asukar. Se mete a kozer todo el tyempo en karishtireyando kon una kuchara de tavla kaji mas de medya ora fina ke se apurese. Se mete medyo limon, se koze otros sinko puntos i se abasha del odjak. Se moja kon limon el dip del un chini de djam, se vazya la pure i se mete a yelar. Se kuvre kon un tulbent, se desha a sekar en un lugar fresko. Se korta en forma de lozanjes. I se kome kon salud i beraha.

Vinyendo al loap de bimbriyo: el kaldo ke aviyamos apartado se mezura: una kupa de kaldo i medya kupa de asukar i un poko de limon. Se mete a kozer fin a ke se espeseya este kaldo. Se vazya en kyasikas chikas i se aspera a ke venga musafires para ofreser kon kucharas de plata i kupas de agua de kristal. Se kome kon alegriya. Esto era el rituel de mi chikes ke me esto akodrando kon dezeyo.

Vos oguro a todos anyada dulse, saludoza, alegre kon repozo de alma i korason. Dingunos ke no peryamos la gana de komer i la savor de boka. Al vermos.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın