La Selebrasion Memorable de 70 Anyos del Jurnal Şalom / 14 Desembre 2017 en Fulya Sanat Merkezi

La Selebrasion Memorable de 70 Anyos del Jurnal Şalom / 14 Desembre 2017 en Fulya Sanat Merkezi

El program:

70 ovras ekspozadas por los 70 anyos del Şalom: 18.30

Un filmo kurto - Un Invitado: E. Özkök 19.15

Kokteyl: 20.30

Konserto: 21.30 Dany Brillant

 

Fiestimos los 70 anyos del jurnal Şalom maraviyozamente, enkavesado por muestro Presidente de la Komunita Judia, Ishak Ibrahimzade i Ivo Molinas, Presidente del Şalom, kon la prezensia del Gran Rabino Isak Haleva.

El Festival de Luzes: LA FIESTA DE HANUKA se selebro en la sala, onorado por el kapo de Beşiktaş Belediyesi, Av. Murat HAZINEDAR.

Se ensendio las kandelas kon kantes de la asistensia.

Muestro Prezidente de la Komunita Judia de Turkiya, Ishak Ibrahimzade, en su diskorso interesante mos aklaro sovre el pasharo de la amblema de muestro Şalom... La relasion konsernando el pasaje judaiko “El Arko de Noe”, muestra istoria. 

No manko en el salon de onorar a muestro grupo de eskrivanos i demando a alevantarmos para rengrasiarmos kon palmas.

Muestro Prezidente Ivo Molinas mos rengrasio tambien.

Dany Brillant mos kanto kansiones demandandomos de partisipar djuntos. La sala se alegro i estuvimos akompanyando sus kansiones nostaljikas i romantikas:

Volare, Bambino, ke mos yevo a muestra chikez.

Tomaron parte en la organizasion perfekta kon sukseso:

Virna Gümüşgerdan, Selin Kandiyoti, Elda Sasun, Sibel Konfino, Karel Valansi, Roksi Levent, Nur Şaul, Sara Kohen, Eti Varon, Bahar Feyzan, Isak Behar.

Silvyo Ovadya i Rubi Asa se okuparon de la organizasion de la ekspozision. 

Savemos ke se resive muncho mas, en dando en maneras diferentes.

La psikolojia pozitiva i alegre ke bivimos, la enerjia de estar en kontakto kon los ke amamos komo si fuera una famiya akojida...

Dany Brillant: “Qui veut venir danser avec moi?”

Suvieron en la shena, muestras Şalomistas jovenes i las ke se sienten jovenes respondieron a la demanda para terminar la fiesta kon un show alegre.

70 artistos pintores i fotografos resivimos los amantes de arte durante el kokteyl.

Şalom, fiestando 70 anyos de su egzistensia mos izo bivir una beyeza remarkavle.

Para munchos anyos kon ŞALOM i PAS.

El mirakolo de Hanuka seya presente... Luzes Klaras siempre...

Rengrasio kon mi tabló yamado: GRATITUD.

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın