Kualo afita oy en diya

Silvyo OVADYA Köşe Yazısı
15 Kasım 2017 Çarşamba

Estamos bivyendo una perioda yeno de evenimyentos. Noche de alhad (Pazar akşamı) un rash ke teniya komo sentro la sivdad de Süleymaniye en Irak se sintyo en munchos paizes. Irak, Iran, Turkiya mizmo Azerbaydjan… Mizmo en Israel de Hayfa fina Ashdod. Un rash ke tuvo una furya (şiddet) de 7,3. Este rash izo un grande danyo en los kazales de Iran serka de la frontyera Irakyana. Malorozamente el maz grande danyo afito en los kazales iranyanos ande fueron fraguados apartamentos par los ladrones dospues de un rash ke afito sesh anyos antes. I todos los apartamentos fueron derrokados. Reelmente para un payis ande los relijiozos son muy poderozos esto no deve de afitar, porke pensan ke se van a ir al Ginnam si azen kozas asemejantes. Ma deve de ser ke no es djusto. Las personas onestas mizmo si no son bastantes relijiozas, pueden fraguar kazas mas rezyas. La Turkiya oy en diya esta ayudando a los Kurdes ke tuvyeron munchos problemes kon la Turkiya dospues del referandum por la independensya del Estado Kurdo.

Diya de alhad el tyempo estava maraviyozo. La demanyana aviya el Maraton d’Estanbol ke se realizo por la 39en vez. La mueva moda es ke los mansevos ke se van al lise keren korrer o kaminar 10 kilometros por una asosyasyon de bienfezensya para ke se tope en el defter antes de irsen a las Amerikas o a la Evropa para estudiar en la universidad. I van a dizir ke los mansevos i mansevas turkos/as son andjelos ke ayudan a todos los menesterozos,  ma dospues ke entraron a la universidad, se olvidan lo ke izyeron para estas ovras. I lo ke realizaron era de mallograr el trafik de Estanbol. Serraron el primer ponte i munchas arteres prensipales de la sivdad para ke los partisipantes puedan korrer kon repozo, sin arabas en el doredor. I dospues de sinkuenta minutos, topimos la felisidad (mutluluk) en tornando atras i en pasando el diya en muestra mahalle… Por una sivdad de diisyete milyones, todos los evenimyentos trayen malorozamente un dezrepozo.

Los diyas dalkavo de la semana pasada i los primeros diyas de esta semana, el Prezidente Trump paso sus diyas en el oryente del mundo: en la China, en el Vietnam, en la Korea del Sud, en las Filipinas… I mizmo en este viyaje el pleto entre el Prezidente Trump i Ben Kim Jong, el diktator de la Korea del Norte no topo fin. Sovre el mesaje de Kim ke lo deskrivyo komo ”Vyejo”, Trump le respondyo kon un twit dizyendo, “yo no lo esto deskrivyendo komo ‘kurto de talya i godro’”. Espero ke estas palavras no van a ser el empesijo de una gerra en el mundo.

En el ventiunyen siglo, es djusto ke las personas van a bivir mas muncho ke bivieron en el venten siglo ma no esto siguro si van a bivir en repozo i paz mizmo si la primera meatad del siglo pasado fue una dezgrasya para la umanidad kon sus dos gerras mundyales.