Klara Perahya, una amiga apresiada, onoravle, de sensia buena i kultura profonda;
Lanterna de los proves de la komunita Judia,
Amandolos, piyadandolos, kon su elegante filantropia...
Reusho a aprendermos a afalagar las famiyas menesterozas,
Atensionada para ser mas i mas jeneroza.
Pusho tambien a glorifikar pintadores i eskulptores,
Entuziasmada de la natura, a eksprimar sus sensasiones.
Reprezentantes artistikos, kon su espozo ELİE,
Alimentaron muestro kultura; se enteresaron al arte Judio.
Humanistos; en su morada ospitavle de tablós ornada...
Ya bivira siempre en muestra memoria.
Amandomos komo una ermana, KLARA PERAHYA ARRELUMBRO
MUESTRA EGZISTENSIA...
Espero ke te toparas, Kerida Klarika, kon Elie, muestro ekstraordinario amigo savyo ke mos alegro kon sus sonos armoniozos de la HUENTE (arrikojidos i adaptados por el Şalom).
Nunka seran olvidados.
Mos izitesh akodrar la lingua de muestros ansestros, el Judeo-Espanyol ke amamos tanto. Vuestro buto i ideal de mantenerla i no desharla “En veilleuse” fue para mozotros un grande grande regalo.
Kerida Klarika, komo te prometi, va kontinuar “tanto ke puedo” a eskrivir los sujetos konsernando el Arte.
Me pushates a ser kreativa en mi arte de pintura tambien. Sin mankar, fuites prezente en mis ekspozisiones. Me da un plazer intenso de eskrivir en muestra gazeta ŞALOM i su mensual EL AMANESER. Te rengrasio de alma i korason.
Vos sueto anyada buena i ke seamos eskkrividos en el livdo de la vida.
Rosh Ashana alegre.
