Desgrasias en las Amerikas i una Ekspozisyon organizada por la Fondasyon de los Kinyentos Anyos

Tenemos siertos amigos en Miami ke biven en Boca Raton i ke mos estan embiyando siertos filmos sovre facebook ande estamos viendo la desgrasya ke estan bivyendo los Amerikanos en esta parte de los Estados Unidos. La primera desgrasya fue en Dallas - ande mora muestra kerida Rachel Amado Bortnick - i dospues la tempesta no se kedo repozada i se fue a las islas de las Karaibes ande derroko todo lo ke topo i syen miles i syen miles de personas kedaron sin kazas. Vemos ke ay siertas islas ke no fueron tokadas por esta tempesta. Ke desgrasya! Un ayre ke esta asoplando a tresyentos kilometros. Komo los trenes – tgv (train a grand vitesse) ke fonksyonan a dosyentas i ochenta mizmo tresyentas i trenta kilometros en una ora. Oy estan avlando ke estan realizando trenes ke van a tener una prestor (hız) de mil kilometros ma kreo ke yo no me va suvir a este treno! Es djusto ke me kero ir muy presto al lugar ke kero ma no so loko de tomar un treno ke tyene una prestor de mil kilometros (mil kilometros en una ora: entiendo ke se va ir de Estanbol a Paris en tres oras). Ma savesh ke esto no se puede realizar kon los rayes ordinaryos (basit). Komo so enjenyor en elektronika mos ambezaron – kuarenta i sinko anyos antes – ke un treno asemejante se puede realizar kon un kavesal elektromanyetiko i el treno deve de bolar ensima de los rayes sin kontakto (kreo ke so el primer enjenyor ke esta dando eksplikasyones tan detalyados en judeo-espanyol).

Las islas de los Karayibes son siertas Amerikanas, siertas Fransezas i siertas Inglezas. Todos los rikos, los artistos i artistas; los kantaderos i kantaderas tienen villas, kazas en estas islas i si tienen mazal las tienen sanas i rezyas. Si no tuvyeron mazal, la kaza esta en ruinas (enkaz).

 Esto no fue bastante i uvo un rash muy fuerte en Mexico i en el doredor. La fuersa del rash fue de 8.2. Una koza terrivle. Tuvieron serka de setenta muertos ma fue un rash terrivle porke turo mas de un punto. No me puedo olvidar del rash ke bivimos en 1999 en Estanbol i ke turo muy muy largo, no aviya fin. Empesi a meldar la Shema… i no se fin ande vine.

I este tyempo mos ambezimos ke dos kozas son muy emportantes: la viyolensya i el tyempo del rash. No me esto puedyendo imajinar un rash de 8.2 ke duro mas de un punto. No vos olvidesh un punto es sesenta segondos. La mas grande felisidad (mutluluk) fue ke el Tusunami ke fue determinado kreo ke no se realizo o no supimos.

No se deke la natura esta tan furyoza. Devemos de demandar si es el yerro de las personas ke kavzan esto? No se por los Estados Unidos i el Mexico! Ma por la Turkiya lo mas emportante es muestros yerros. Si keremos fraguar un edifisyo ensima del kamino de las aguas, malorozamente dospues de una buen luvya las aguas no pueden topar el kamino para ir a la mar. I es el empesijo de las inondasyones (su baskını). En Estanbol estan inchendo la mar para azer muevos kaminos. I agora dyeron karar! para azer un segundo estrecho (boğaz) antes de Estanbol para trokar el kamino de los vapores. Esto va ser una desgrasya para la natura! La umanidad deve de saver ke no se kere djugar muncho kon la natura porke dospues el ekilibro se va deteryorarse (denge bozulacak) i vamos a bivir munchas desgrasyas. Espero ke esta desgrasya va ser la dalkavo para un tyempo determinado (belirli bir zaman için).

***

Lunes la tadre, el Sentro Kultural de Neve Şalom ke se topa debasho del Muzeo Djudio fue el proprietaryo de una ekspozisyon. Komo disho en su avla Rubi Asa, el kurator de la ekspozisyon, oy en diya es muy yüch de konoser los vizinos mizmo el vizino del apartamento de al lado del edifisyo ke bivimos. Ay puedeser eksepsyones ma no munchos.

 Todos saven ke reelmente “el vizindado (komşuluk)” es una koza nostaljika en muestro siglo. Viendo esta mankura, los kuratores del bienal d’Estanbol eskojeron el tema “Vezindado” para el bienal del anyo 2017 d’Estanbol. Dainda no aviya la posibilidad de vijitar las ekspozisyones o las enstalasyones del Bienal. Ma reelmente la Ekspozisyon de fotografiyas del Muzeo estava muy atraktiva. Organizaron esta ekspozisyon kon dodje artistos de fotografiya. Reelmente es muy enteresante de estar kon los artistos djudios, musulmanos, ermenis i gregos. Fue una kompozisyon de kolor (renkli). Kon serka de syen fotografiyas esta ekspozisyon va ser permanente (kalıcı) kon el livro ke fue publikado. Malorozamente muestro muzeo dospues de la situasyon politika ke los evropeos i los amerikanos no lo topan muy pozitiva, munchos turistos amerikanos i evropeos no preferan vijitar muesto pais i muestra sivdad. Oy puedeser no ay una grande piedridad del punto de vista de los turistos, ma es muy fasil de determinar ke el nombre de los turistos ke pueden vijitar muestro muzeo no es el mizmo porke la mas grande partida de los turistos ke vijitan Estanbol son orijinaryos de los estados arabes, i no estan enteresados en el Muzeo Djudio.

Para realizar esta egzibisyon i publikar su livro teniyamos de menester de un syerto montante de moneda. De vez en kuando es la Komunidad o un donador ke da esta moneda. Ma no kijimos esto i preferimos los donos mas modestos de dyes almas. I este modo este proyekto fue realizado kon el ayudo de munchas personas. Anyos antes en las tyerras turkas, syertas kozas se realizavan kon el ayudo materyel o moral o fizika (bedenen) de munchas personas. I esto se yamava “Imece”. Malorozamente no topi el biervo egzakto ke se emplea en Judeo- Espanyol para sinyifikar esta dicha. I puedeser ke no egziste.

Ay munchos anyos ke muestro muzeo esta avyereto i aze munchas aktivitades ma reelmente no reusho a ser el lugar ande el puevlo viene fasilmente. Mizmo ke esta vez, embiyaron avizos por los medios elektronikos, una grande partida de esta djente telefonaron para demandar si la entrada a esta ekspozisyon era reelmente libre.

En esta ekspozisyon el lavoro de Dalia Maya deve de ser apresiyada. Ay muncha djente ke lavora ma eya lavoro kon una veluntad sin limito. I solamente si lavoramos de esta manera vamos a ser kapaches de pueder organizar siertos evenimientos ke van a dar boz i ke toda la djente van a tener haber.

 El otro eroe (kahraman) de este evenimyento fue muestro amigo Rubi Asa ke es un artisto de fotografia muy kapache i muy modesto. Kada vez ke tengo de menester de un echo sovre una ekspozisyon de fotografia es el primer ke devo de bushkar. Porke no ay el “NO” en su diksyonaryo. El Sinyor Hakan Cırcır ke tuve el plazer de konoserlo solo oy; ayudo del punto grafika a esta ekspozisyon. Kero rengrasyar el Prezidente de la Fondasyon, el sinyor Avi Habib, ke mos dyo el koraje de realizar este evenimyento. Espero ke vamos a reushir a ekspozar la mizma ekspozisyon en la Sinagoga de Edirne.

Para eskapar mi artikolo oy demanyana en Viena, fui a una seremoniya ande el Ministro de Urbanizasyon i el Ambassador Turko lavoraron endjuntos para meter una plaketa en un edifisyo ke fue el lugar ande fue fraguada la Sinagoga Sefardi Turka. Vos va kontar lo ke avlimos en esta seremoniya ma no esta semana…

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın