El Muzeo de las Islas

Silvyo OVADYA Köşe Yazısı
20 Temmuz 2017 Perşembe

En Estanbol dainda una partida emportante de los miembros de muestra komunidad en enverano moran en las Islas de Prinsipe (Prens Adaları). Este nombre fue dado porke en el empesijo del Imperio Bizantino siertos prenses fueron eksilados a estas islas kuando el rey no keriya ke bivan en Estanbol o Konstantinopolis. I mizmo en la primera partida de la republika munchas personas fueron embiyados a estas islas para ofisios ofisiales ma no komo rekompensa (mükafat) ma komo penitensya (ceza). Ke devemos entender de penitensya? Porke estas personas no pensavan de la mizma manera ke los dirijentes del pais. O los dirijentes pensavan ke estas personas pueden azer danyo al payis. Oy en diya no se si es la mizma koza ma siertas personas estan muy kontentes de lavorar en las islas.

En la isla “Büyükada” ke es reelmente la mas grande tenemos un muzeo de la sivdad “Kent Müzesi” ke se avrio antes serka dyes anyos i este tyempo reelmente los ayudi para ke meten siertas kozas sovre los djudios ke bivieron en las islas. Es akel tyempo ke me ambezi ke uno de los kosfuegros de muestro Hahambashi Haleva era un  “Adali” (de la isla). Es akel tyempo ke me ambezi ke el granpapa de muestro Davut del Şalom i de las lisyones de Ladino era muy famozo en Heybeli i lo yamavan no se deke “Ipana”. El vendiya los mijores turshis. Demandi de su padre ke mos desho la vida un mez antes ke me tope fotos. Me embiyo una fotokopia de una foto ke poseda su ermano ke bive en Israel. Es akel tyempo ke supe ke avia siertas famiyas ke bivyeron en las islas para la sanedad de sus kriyaturas.

El muzeo kada anyo organiza una o dos ekspozisyones. I publika siertos livros ke son reelmente muy importantes para konoser la vida de las islas. No es yo ke eskrivi ma le di koraje al sinyor Viktor Albukrek para ke eskriva sus memoryas sovre las islas. I este livro tuvo una reedisyon (por la tresera vez) este mez.

Noche de shabat, a la tadre mos fuimos kon motor a “Aya Nikola” ke es leshos del Debarkader; djusto al lado del Yıldırım ande avia la avyertura de dos ekspozisyones. El primer era “Las Barkas de los Egzilados” (Sürgün Kayıkları). Los ke izieron esta ekspozisyon toparon en primero siertas barkas viejas en diferentes puntos de las islas i kon todo modo de materyal naturel las ornaron. Estas sesh barkas fueron ekspozadas en el kortijo del muzeo. El ornamento fue realizado par Gül Bolulu ke es una maestra en el tekstil i ensenya en siertas universidades en Estanbol.

Akilas Milas, un “Adalı” ke bive en Gresia aparejo un livro sovre la istoria de los vapores en Estanbol o en las Islas. Este ombre ke es un mediko renomado, tiene un talento para azer todo modo de figuras (çizim). Ke no vos pareska ke este es el primer livro ke publiko. El eskrivio un livro eksepsyonal sovre la isla “Prinkipo-Büyükada”, agora esta publikando su livro sovre “Halki-Heybeliada” en turko. Este livro es publikado en inglez i en grego. I el treser livro va ser sovre “Antigoni i Proti- Burgaz i Kinali”. El anyo pasado kuando vino a vijitar las islas disho al prezidente de la fondasyon “Devesh de azer presto para profitar de mi” porke es un ombre de una sierta edad. Reelmente es muy emportante para la istoria de las islas publikar todas las ovras del mediko Akilas Milas.

Para eskapar mi artikolo devo de anunsyar ke estamos dando una sefer tora ke fue empleada en la sinagoga de Büyükada. I un parohet. Este modo los ke vijitan el muzeo de la Büyükada van a saver ke los djudios bivieron i biven en estas islas.

La granmama i el granpapa de mi mujer se kazaron en la Sinagoga de Büyükada serka de los anyos 1927. No moravan en las islas ma se kazaron aya!