Evenimiyento en la Sinagoga de Edirne (2)

La semana pasada teniya tanto de kontar ke vos konti solo una partida de lo ke bivimos durante las preparasyones i la realizasyon del konserto i del pranso.

Ya se ke Lunes avia el Konserto de “Los Pasharos Sefaradis” en el Sentro Kultural de Caddebostan organizada por la Komunidad de Caddebostan-Haydarpasha. Malorozamente komo fui al aeroporto a renkontrar mi mujer ke estava tornando de viaje porke estavamos envitados a Israel para una boda de la ija de un primo de mi mujer. Malorozamente no pude ir i es eya ke reprezento muestra famiya. Yo estuve en Estanbol kon mi ijo mirando los maches de basketbol ke eran parte del Final Four del Euroleague. Los maches eran en Estambol. I Fenerbahçe – ekipa turka – reusho a tomar parte entre estas kuatro ekipas. Estavamos a kuatro ojos asperando ke Fenerbahçe resiva la kupa del Euroleague. Ya saviamos ke no era muy fasil de resivirla kon los guerkos ke aviya (CSK Moskova, Real Madrid, Olympiakos). I la ekipa turka Fenerbahçe, por la primera vez en la istoria del Basketbol Turko reusho a ganar esta kupa. I todos kontentes i regalados estavamos fina las dos de la demanyana mirando la televizyon.

Vos dishe ke va avlar sovre el Konserto ke realizimos en Edirne ma vos esto kontando todo modo de kozas sin avlar del famozo konserto. No se si tuvitesh la posibilidad de sintir en la shena al Kontrtenor David De’Or. Kualo es kontrtenor? Es una boz ke es reelmente el kontraryo de una boz tenor. Es una boz muy fina. I savemos ke ay muy poka djente ke pueden kantar este modo. David no es la primera vez ke vino a Estanbol. Kuando Zali Detoledo era atashe kultural de Israel en muestro pais, organizo a lo manko dos konsertos en CRR (El Salon Cemal Reşit Rey en Harbiye) i me esto akodrando el Konserto de David en el Kal de Neve Şalom. Komo teniyamos munchas personas ofisyales de Edirne i de Ankara preferimos un konserto ke kontenia mas muncho kantes de opera (en inglez o italyano era mi preferensya) i kantes liturjikos, kantes ke kantamos en las Sinagogas. Los dos albumes dalkavo de De’Or son en este djenero. I reelmente es muy emosyonante de sintirlo. Mizmo de sintirlos porke en estos dos albumes De’Or esta kantando kon un Hazan. En el konserto una partida de las kantikas eran kantikas ebreas. Ay munchos kantadores ke kantan kantikas en ebreo ma ay muy poka djente ke son kapaches de kantar kantes de opera i kantes ke kantamos en las sinagogas.

Antes del konserto teniyamos un “barbecue party” ande komimos ligado kasher de Edirne. Vos va kontar lo ke penimos el anyo pasado para realizar esto. Ya savesh ke para ke la karne sea kasher kale echar sal i este modo se kita la sangre ke se topa aryentro de la karne. Ma esto no es valivle solo por el ligado. Kale en primero asarlo ensima del mangal i dospues lo puedemos mundar i azerlo izgara a la Edirneli. El ligado d’Andirne reelmente es muy famozo en la mupak Turko. I agora tenemos todo lo ke es menester para aparejar ligado asado kasher.

De diya en diya vemos ke munchas personas miran el kasherut i tenemos mas munchos mushteris ke son enteresados kon este modo de komidas, porke no tienen la posibilidad de komer este modo de komidas en otros lugares.

Dospues ke eskapimos la organizasyon de este konserto, estamos pensando ke puedemos organizar el anyo ke viene. Un konserto ma kon ke artisto? Devemos de trayer un muzisyen de alta reputasyon. Si tenesh una idea puedesh kontaktarmos para partajar vuestras ideas.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın