Monumento De Los Kalsados De Las Vıktımas Del Olokosto

Dora NİYEGO Judeo-Espanyol
10 Mayıs 2017 Çarşamba

Miklos Voglhut nasio en el anyo 1898, en una famiya judia ande los miembros eran todos artistas. Milkos, kuando era mansevo, kijo azer una kariera en muzika i teatro. Su ermano era klarnetista i saksofonista. Su sovrino era un muziko famozo de jazz. Miklos, en poko tiempo, se izo famozo, ma en el anyo 1924, un grande antisemitizmo empeso en Ungria i en la Evropa. Miklos fue ovligado de trokar su nombre. Tomo un nombre mas ungaro, i se izo Miklos Vig. La sinyifikasion de Vig en ungaro es alegre.

Miklos Vig estudio en Geza Boross. Dezso Gyarfas i Antal Nyaray deskuvrieron su talente, i lo tomaron para ke lavore en el Intim Kabare komo solista, i mas duspues en otros kabares komo el Budapest Operetta Theatre i Budapest Orfeum. Mezmo ke kito munchas plakas, Miklos Vig se izo mas famozo en la radio, komo kantante de muzika popular. Un artikolo del anyo 1935, en la revista Szinhazi Elet, eskrivio ke Miklos fue mas renomado komo un kantante de kantikas sentimentales populares.

Segun la revista ungara de jazz i muzika klasika, Gramofon, Miklos fue un grande muziko ungaro. Miklos kanto i baylo en diversos kabares en los anyos 1920s.

En el invierno de 1944, mezmo ke no teniya un nombre judio, i ke se aviya kazado kon la ija de una famiya katolika, a Miklos se lo yevaron kon otros del getto para aktividades judias. Komo munchos judios antes de el, i munchos judios mas despues de el, i el fue ovligado a dezmudarse enfrente del rio Danubio.

Los nazis tiraron los fuziles de detras, los mataron a todos los prizonieros, i duspues, dezmudos los acharon al rio. Esto lo izieron munchas vezes en los anyos 1944-1945 en Budapest. El diplomat Raoul Wallenberg reusho a salvar munchos de este destino terivle, ma malorozamente i munchos murieron.

Los eskultores (heykeltıraş) Gyula Pauer i Can Togay izieron eskulturas (heykel) de los kalsados de las viktimas, i los plasaron djusto en frente del manyifiko edifisio del Parlamento en el bodre del rio. Los vijitantes ke vienen aya, ven 60 pares de kalsados echos de fierro. Los kalsados de diferentes numeros (kalsados de kreaturas, mujeres, i ombres) estan amostrando ke dingunos no puedieron salvarsen de la brutalidad del Olokosto. Detras de la eskultura, ay un banko de piedra de 40 metros de largor, i 70 cm de altura, ande en las tres puntas, ay sinyos de fierro enriva de los kualos, esta eskrito un teksto en ungaro, ingles, i ebreo: “A la memoria de las viktimas ke desaparesieron en el rio Danubio, ande los milises Arrow Cross los echaron, en los anyos 1944-45. Las eskulturas fueron kreadas en el 16 de avril del anyo 2005. “

En una vijita al monumento de los kalsados, puedesh ver los parientes de las viktimas, metiendo rozas, o kandelas para onorar las viktimas ke dieron sus vidas. En el areskuro de la noche, kon la splendor de las kandelas i de la luna, la eskultura reprezenta un imaje muy diferente de la soledad.

Kale estar un punto allado de estos kalsados, i pensar ke karar de mazalozos semos mozotros.