Kualo es la razon del antisemitizmo?

Dora NİYEGO Judeo-Espanyol
15 Mart 2017 Çarşamba

La istoria esta amostrando ke en varios tiempos durante los ultimos 1700 anyos, los judios fueron ekspulsados de mas de ochenta paizes diferentes. Los istorianos i los ekspertos estan diziendo ke ay diferentes razones por el antisemitizmo. Ma estas teorias no tienen dinguna sustensia.

1. Los judios son de una raza inferior. La verdad es ke los judios no son una rasa. Los judios son un puevlo. Kualsiker persona en el mundo de kualsiker kolor o rasa, puede konvertirse al judaizmo.

2. Los judios tienen rikeza i poder. La istoria esta amostrado ke del diisieten al venten siglo espesialmente en Polonya i Rusia, los judios eran muy proves i no tenian dinguna influensia en la politika o ekonomia del paiz. Mezmo ke era ansina, el antisemitizmo no se areto en estos tiempos.

3. Los judios son diferentes de los otros. Durante el diziochen siglo, los judios kijeron asimilarsen kon el resto de la Evropa. Estavan esperando ke kon la asimilasion, el antisemitizmo iva desapareser. Ma ni esto no valio. Los evropeos empesaron a dizir ke los judios van a enfektar sus rasa kon jenes inferiores. Esto es lo ke afito en la Alemanya antes de la Segunda Gerra Mondial.

4. Los judios son la razon de todos los problemas del mundo. Todo negro ke afita en el mundo es la kulpa de los judios. Los judios son el pagano (günah keçisi) porke siempre fueron un objektivo konvenible (uygun hedef).

5. Los judios mataron a Jezu. La Bibla esta diziendo ke los Romanos mataron a Jezu. Unos sienes de anyos mas tarde, los judios fueron kulpados de ser los asasinos de Jezu. El Vatikano deklaro en el anyo 1963, ke los judios no son responsable de la muerte de Jezu. Ma, dinguna deklarasion no diminuno (azaltmak) el antisemitizmo.

6. Los judios deklaran ke son el ‘puevlo elijido’. El Dio embiyo los judios para yevar su Palavra, la Ley i la moral a un mundo yeno de pekados. Esto es eskrito en la Bibla. Los judios sufrieron muncho de esta teoria. Para ke los judios no sufran mas del antisemitizmo, en el anyo 1945, Mordehai Kaplan,  el fondador del movimiento rekonstruktivo, publiko un livro diziendo ke ‘los judios modernos no kreen ke son elijidos por Dio’. Los judios en Alemanya desharon sus kondision de “elejido” para asimilarsen mijor kon la kultura alemana. Ma ni esto no abasto. Eyos sufrieron el Olokosto.

Los judios se salvaron de los babilonios, los persos, los asirios, los ejipsianos, los hititos, i los nazis. Estos puevlos, kada vez, no reusheron a eliminarlos. El Dio los protejo. Los Romanos (11:26) mos dizen ke ‘algun dia Israel (el puevlo judio) se va salvar, i si el estado Israel no egziste, esto no va ser realizado’. Por esto, el Dio va prezervar los judíos en el futuro, komo los prezervo a traves la istoria. Nada no va pueder trokar el plan del Dio.