Kuando empesaron a inyegar el olokosto, desido de romper su silensio i kontar todo

Dora NİYEGO Judeo-Espanyol
1 Şubat 2017 Çarşamba

Judith Rosenzweig es una de los pokos judios ke sovrebivieron el Olokosto.

Judith nasio en Chekoslovakia en el anyo1930. A la edad de katorze anyos, la yevaron al kampo de konsantrasion de Auschwitz. En el anyo1948, se fue a Israel. Lavoro aya komo infermiera i se kazo. Oy, Judith Rosenzweig tiene 87 anyos, bive en un azil en Haifa, dedikado a los sovrebivientes del Olokosto.

Judith Rosenzweig esta diziendo ke en su livro de sus memorias, eskrivio esta fraz: “Yo nasi en el sielo, me kitaron del Ganeden komo Adam i Eva”. Judith teniya mueve anyos kuando los alemanes entraron a Chekoslovakia. En primero trusheron proibisiones a los judios. No se puedian ir al parko o al sinema. Las kreaturas no se puedian ir a la eskola. Por esta razon, Judith pudo meldar fin a la kuatrena klasa. En el anyo1942, a la famiya entera los yevaron al geto de Terezin.

“Meti el nombre ‘La Ijika de la Kamareta 28’ a mi livro porke estava en la mezma kamareta kon vente i mueve ijikas en Terezin” esta diziendo Judith. “Mos echavamos en kamas de tres etajes. Teniamos una tabla detras la kama, ande metiamos las kozas ke teniamos menester. En el anyo 1944, mos yevaron al Kampo Kolektivo Auschwitz. Mos metieron a las mujeres en una fila (sıra), i los ombres en otra fila. Esto fue la vez dalkavo ke vide a mi padre. Kuando arivimos a Auschwitz, el mediko Josef Mengele desido ken iva pueder lavorar bueno, i ken no. Los ke no puedian lavorar bueno fueron embiados a las kamaras de gaz. Mi madre, mi ermana, i yo, eramos de las ke puedian lavorar bueno. Mos yevaron a una baraka. Al dia, empesimos a lavorar. Era invierno, i el lugar ke ivamos a lavorar era leshos. Kada dia, mos ivamos aya a pie, i deskalsas”.

Auschwitz fue liberado en el anyo1945, ma unas kuantas semanas antes de la liberasion, Judith i su famiya fueron embiyados al kampo Bergen Belsen, en vagones aviertos. Era el mez de Febrero, i no estavan puediendo rezistir la yelor terrivle.

“Bergen Belsen era un lugar terrivle” esta diziendo Judith. “Munchas personas murieron aya de la ambre i de las hazinuras. Mos aziyan asperar afuera oras i oras, diziendo ke mos devian de kontar. Yo me estava ezmayando, ma mi madre i mi ermana me estavan punchando para ke me venga en mi. Kuando el kampo fue liberado en el mez de avril del anyo 1945, los soldados inglezes vinieron a Bergen-Belsen, para darmos esta novela. Mos dieron supa, i me sinti mijor. Mi ermana se hazineyo, i mi madre murio una semana duspues ke el kampo fue liberado”.Kuando Judith i su ermana se fueron a kaza, vieron ke su ermano aviya tornado tambien. Judith les disho a sus ermanos ke se iva ir a Israel, i dos anyos duspues, se fue a Haifa.

“Era el 15 de mayo del anyo 1948. Era el primer dia del estado de Israel” esta diziendo Judith. ‘Kuando arivi a Israel, teniya diziocho anyos. En primero, mos enstalaron en un otel. Al dia, mos demandaron ande mos keriyamos ir, i mos dieron a kada uno, un bilyeto de otobus. Yo me kije ir a Haifa, porke la ermana de mi madre biviya aya. Keriya kontinuar mis estudios, ma teniya diziocho anyos, i no era buena eleva en la eskola. El mundo no se estava kreendo a lo ke bivimos. Mezmo mi tia estava diziendo ke estava egzajerando. I yo, me estuve kayada durante munchos anyos, i no konti nada a dingunos, de lo ke pasimos. Ma kuando vide ke, los ke estan inyegando el Olokosto, estan pujando de dia en dia, me desidi de eskrivir i kontar a todos, todo lo ke pasimos”.

Oy, Judith Rosenzweig tiene 87 anyos, i esta mirando a kontar su estoria a kada uno. Esta diziendo ke es muy emportante para eya ke los rekuerdos de akeyos anyos keden bivos. “Es muy emportante para mi, porke dainda ay personas ke estan pensando ke los estamos enventando”.

Judith Rosenzweig, munchas vezes se fue a la Alemanya, para avlar en las eskolas. Esta diziendo ke estos rekuerdos no deven de pedrersen. “Mi jenerasion es el dalkavo testigo (şahit) de lo ke paso en el Olokosto. Es difisil para las personas de entender lo ke afito a los judios, i la razon deke afito esto todo. Kale dizirlo al mundo entero porke no afite de muevo. Las personas no deven de matar a dingunos por modo de sus fe (inanç)”.