Vaera

Rav Yeuda ADONİ Köşe Yazısı
25 Ocak 2017 Çarşamba

En la perasha de Vaera meldamos las yagas ke trusho El Todo Poderozo a los Ejipsyanos. Las syete yagas estan mensyonadas en la perasha de esta semana i las tres ultimas en la perasha de ‘Bo’.

En el entervalo de un anyo, mando El Kriyador dyez yagas, una mas fuerte ke otra a el Ejipto. En primero se trokaron las aguas del Nilos en sangre, i muryeron los peshkados del riyo. Despues se muchiguaron en el riyo de ranas, i salyendo despues de la agua, kavzaron munchos danyos en la tyerra. Despues se konkriyo en todo el Ejipto unos piojos de una manera muy danyoza.

Mas despues arivo a el Ejipto unos animales krueles ke kevrantaron muncho a el puevlo. Despues uvo una mortaldad terrivle en las kuatropeas ke izo muncho danyo. Una negra sarna les vino a todos los Ejipsyanos asta no pueder suportar. Despues uvo un buen pedrisko ke danyo todos las frutas del kanpo. Despues, les mando la langosta ke danyo todo lo sembrado. Despues les mando El Todo Poderozo una fuerte eskuridad ke turo tres diyas i tres noches de una manera ke los izo kevrantar muncho, syendo no se puedian menear kada uno de su lugar. Todos estas males fue suportando Paro, en tal de estar en su kapricho i no mandar a los Djudyos de su tyera.

Lo ke aze maraviyar es, kuando se apezgava la fortaleza de la yaga sovre el i su puevlo, ya paresiya ke se iva ablandar su korason i ya prometiya de dar la libertad a los Djudyos.

Apenas kalmava la yaga i teniya un poko repozo, tornava a su negro, i se enduresiya su korason. De esta manera suporto Paro, i todo su puevlo estas 9 terrivles yagas. Los Djudyos ke se topavan en mizmo lugar kon los Ejipsyanos era una grande maraviya ke no teniyan ningun mal.

La dyezena yaga, el (Makat Behorot) no pudo suportar asta el kavo, i se le ablando su korason, despues de sufrir bastante ke todos los ijos mayores (behorot) de los Ejipsyanos sin diferensya de chiko a grande, fin el ijo de Paro, muryeron todos de una.

Fue forsado Paro de parte todo su puevlo de yamar a Moshe i a Aaron, i rogarles ke salyeran eyos i todos los Djudyos del Ejipto, i ke rogaran por su vida.