Vayetse

Rav Yeuda ADONİ Köşe Yazısı
7 Aralık 2016 Çarşamba

Despues de estar Yaakov 14 anyos en la kaza de Ever, se fue a Harran onde Lavan su tiyo, sigun el komando de su padre i su madre, tuvyendo avizo de Esav ke Yaakov esta indose a Harran, mando a Elifaz su ijo ke lo presigya en el kamino i ke lo mate.

Elifaz no manko de azer el orden de su padre i se fue kon muncha djente a presigir a Yaakov. El Dyo Santo estuvo en ayuda de Yaakov en tomando Elifaz de deshar bivo a Yaakov, i se kontento Elifaz de deshar bivo a Yaakov en tomandole todo lo ke teniya i se torno a su lugar.

Ansi es ke Yaakov lo pudo konvenser a Elifaz a ke lo deshara en vida. Elifaz lo dize a Yaakov su tiyo, “mi padre me ordeno de matarte. No puedo pasar el orden de mi padre si no ke ovedeser”. Yaakov le responde dizyendo: “Ay una palavra ke dizen ‘Ani Hashuv Kamet- El prove asemeja a el muerto’. Dunke si me tomas toda la azyenda ke posedo, es komo me mataras”. I Elifaz toma toda la azyenda de Yaakov i torna onde su padre.

Yaakov arivo a Harran i vyendo a Rahel, la ija chika de Lavan, paseando en el kampo las ovejas de su padre, se dyo a konoser kon eya, i tuvyendo avizo Lavan su padre, se lo yevo a kaza kon muncha kerensya. I estuvo en su kaza serka un mez.

Entremyentes estuvo Yaakov paseando las ovejas de su tiyo en lugar de sus ijas.

Lavan no kijo ke Yaakov lo sirvyera debaldez, se metyeron de akordo, ke sirvyere Yaakov kon sus ovejas 7 anyos, i darle en paga a Rahel su ija por mujer.

Despues ke termino Yaakov sus 7 anyos kon las ovejas de Lavan ke le dyera a Rahel por mujer sigun su kondisyon, Lavan ke era un ombre embrolyador i enganyador le dyo a Lea, su ija la grande, en lugar de Rahel. Este konporto de Lavan le desplazyo muncho a Yaakov, i kedaron de akordo, kon kondisyon ke va lavorar Yaakov otro 7 anyos, i Lavan le va dar a su ija chika, a Rahel.