Los 25 anyos de un Karikaturisto

Silvyo OVADYA Köşe Yazısı
7 Aralık 2016 Çarşamba

 

İzel Rozental, un ombre de kultura ke es konosido en los entornos intelektuales de muestra sivdad,  mizmo de muestro pais, es konosido en primero por sus karikaturas ke topan lugar en el Şalom los vente i sinko anyos dalkavo.  Dishe ke es un intelektual konosido en muestro pais; es mintiras porke lo vide en la television franseza TV5 en el program “Kiosk” ke es muy konosido kon las ideas diferentes de intelektuales.  I me akodro ke İzel tomo lugar en un program de esta televizyon. El fue miembro de los juris de kompetisyones de karikaturas i tiene bastantes relasyones kon los karikaturistos de muestro pais mizmo los karikaturistos mundiales muy konosidos.  Vemos en su livro dalkavo dos personas muy renomadas – Plantu i Michel Kichka- ke eskrivyeron la prezentasyon del livro.

El eskrivyo munchos livros ande konta sus viajes o konta sovre el kuartier ande bive: Moda ke es el kazal de la chikes de su mujer.  En turko se dize “hanımköylü” (del kazal de la mujer!).  I kreo ke es la mizma koza para İzel.  En el anyo 2010, İstanbul fue nomado “Kapitala de la Kultura” i una organizasyon izo un alay de aktividades.  Entre estas aktividades la kaza de publikasyon de la Munisipalidad de la sivdad publiko livros sovre los kuartyeres de muestra sivdad.  I Izel es el autor del livro sovre Moda.  Me akodro de su primer livro sovre sus viajes. 

Kuando yo era redaktor del Şalom: unos kuantos anyos dospues tuve la posibilidad de konoser Izel Rozental; i mos disho ke puedia desinar karikaturas.  Kale konfesar ke no konosia miembros de muestra komunidad ke puedian desinar karikaturas seriozamente (kada semana pensando lo ke deve de azer).  Kuando mirash una karikatura, ya vos puede pareser ke es muy kolay.  Ma para topar la idea i para desinar de vez en kuando deve de ser muy difisil.  I empesimos a publikar en la primera oja lo ke desinava Izel.  Ya paso vente i sinko anyos.  Paso syertos enveranos en la Riviera Franseza; se fue a viyajar a la Afrika, a los Estados Unidos i a munchos otros paizes.  Es djusto ke teniamos mizmo este tyempo la makina de faks ma puedeser no era muy fasil de topar un lugar para mandar.  Izel reusho a embiyarmos sus karikaturas de los kuatro puntos del mundo. 

Verso la fin de la semana pasada, telefoni a İvo Molinas muestro patron, i le demandi si aviyan preparado un regalo para Izel por sus vente i sinko anyos. I le propozi de merkar una karikatura ke se devia de vender dia de alhad en una vendida de pujita avyerta (açık artırma müzayedesi).  Era una karikatura echa en el anyo 1920 sovre la influensya de los Estados Unidos sovre muestro payis (el Imperio Otomano-la Turkiya).  I reushi a merkarlo.  I lunes la noche el Şalom lo izo regalo.

Lunes la noche, (5 de Disembre 2016) kuando entri al Schneidertempel avia munchas personas; miembros de muestra komunidad; miembros del Şalom i munchos intelektuales i karikaturistos de muestra sivdad. Izel lavoro muncho para dekorar esta sinagoga.  En esta epoka reelmente no es muy fasil de desinar karikaturas politikas. Porke no kale tokar a siertas kozas o siertos puntos.  Si tokas, puedes topar la bela. Por esto la sala estava dekorada komo una prizyon i ensima de las paredes avia teles kon punchones (dikenli tel).  En las paredes siertas palavras i un alay de karikaturas.  El Şalom aparejo un livro sovre esta ekspozisyon intitulado “Karikatör”.

Me akodri del primer livro de İzel ke fue publikado en el 1991 a la fin del primer anyo de su viaje en el Şalom.  Reelmente vente i sinko anyos antes no era muy kolay de topar personas ke se enteresavan en livros de karikaturas.  Puedeser vente i sinko anyos dospues es diferente.  Esta noche avia munchos meraklis koma mi ke merkaron el livro i tuvieron la oportunidad de azer afirmarlo al Sinyor Rozental.

Eskrivi mis sentimientos en el tefter de memorias (anı defteri) ke se topava en la entrada del Schneidertempel.  Reelmente una persona ke kontinua a imajinar (hayal kurmak) es mansevo mizmo si tyene los kaveyos blankos.