La Fiesta de Sukot

Kontado por: Yusuf Besalel, el savio de muestra famiya

 

Sukot es un sembol universal, ke sinyifika la libertad.

1 - Sukot es la fiesta de las SUKAS (çardaklar). Este nombre proviene de la primera sivdad Sukkoda, ande se arepozaron los Israelitas despues ke salieron del esklavajio en el Ayifto (Exodus 13;20 i nos 33; 3 - 5 en la Tora) en sus kaminos para la tierra de Israel.

2 - El komandamiento de fraguar sukotes i selebrar una fiesta de 7 dias para komemorar un evenimiento de tranzision era spesifikado en la Tora; Levitikus 23; 42 - 43

3 - Sukot es una de las fiestas por el peligrinaje (hac), para Yerushalayim, en desparte de Pesah i Shavuot. Es en mizmo tiempo una de las fiestas selebradas en el mes Sakrado mez de los judios, el mez de Tishri, el 15 de este mez, despues de las fiestas Rosh-Ashana i Yom Kipur.

Sukot komemora el empesijo del fraguamiento del Tabernaklo (mabet çardak) en el dezierto SINAI.

4 - Sukot avia djugado un rolo de yave (anahtar) en la rekonstruksion del pais Judio i en trayendo endjuntos los Judios antes de entrar a la Tierra Santa de Israel. Sukot fue tambien la primera estasion ande se kedo Yaakov despues ke se fuyo de su esfuegro Lavan.

El profeta ordono la fragua de Sukot (çadırlar) kuando entraron en la Tierra Santa despues de un egzilio de 70 anyos en Babilonya.

SUKA sinyifika una TOTALITAD i una PROTEKSION.

5 - Sukot es la tresera emportante fiesta i el shifro 3 reprezenta una INTELIJENSIA DIVINA; STABILIDAD, ENTEGRASION I PAS...

El treser dia de la kreasion fue bendicha por el Dio Baruhu. El aparesio ensima de la Montanya de Sinai i tres vezes despues ke Moshe Rabenu suvyo tres vezes aya. Los tres patriarkos son: AVRAM, YITSHAK i YAAKOV.

6 - EL LIVRO DE KOHELET eskrito para Shelomo Ameleh es meldado en esta fiesta i komprende la filozofia de este rey en lo ke konserna la emportansa de la UMILIDAD, AMISTAD, PERSPEKTIVO, PASENSIA, REALISMO i SAVYA MORALIDAD.

En el livro Kohelet, Shelomo el rey eskrive:

“UNA KUEDRA KON TRES FILAMENTOS NO SE PUEDE FASILMENTE ROMPER.”

KOHELET tambien es un biervo ke proviene del verbo Hakhel Ebreo: Vinir Endjuntos.

Kuando se selebra la fiesta de Sukot, la djente komen i beven debasho de las tentas, las sukas.

LA SUKA es el lugar ande se unifikan la vida material i la vida moral; es un simbolo ke sinyifika de una parte la entitad i el estado de estar endjuntos entre la famiya i de la otra parte la ospitalidad i la ALEGRIA.

Entre el tiempo ke esta kontinuando esta fiesta de 7 dias, eksepto el dia de Shabat, en kada orasion de la demanyana ay 4 plantas i ke se meneyan en todas las direksiones, i ke se transportan:

Arvoles de datiles LULAV (hurma) son los mas ermozos arvoles en el mundo i las ramas paresen a la kolona vertebral del ombre.

HADAS: Nombrado tambien Mersin Ağacı en Turko kon su golor ke da plazer parese a los ojos, simboliza las personas ke se ambezan la Tora i se komportan bueno komo lo kere el livro.

ERTOG: Simboliza la mas mijor fruta de los arvoles i la yaman “melon de Arvoles”. Es este fruto ke parese dizen al korason umano.

LULAV: Simboliza las personas ke se ambezan la Tora ma ke no se komportan komo lo kere el livro.

Kuando estas plantas se tienen en la mano endjuntos, todos los karakteres diferentes sinyifikan el Puevlo Judio ke se unisan enfrente de El Santo i Bendicho.

Los siete padres de Israel salen del Ganeden para vijitar las SUKAS durante la Fiesta de Sukot.

1 - La primera noche: Avraam (Amistad i Buendad)

2 – La sigunda noche: Yitshak (poder personal i tener en la mano su voluntad).

3 – La tresera noche: Yaakov (Ermozura i Verdad).

4 – La kuatrena noche: Moshe (La Potensia de la Tora i La Eternidad).

5 -  La sinkena noche: Aaron (La Empatia i La Grandesa del Dio Baruhu).

6 – La sejena noche: Yosef (Santedad i Fondamiento Spiritual).

7 – La sietena noche: David (Estableser el Reynado del Paradiso ensima del mundo, i esto viene a de los otros 6...

Debasho de la Suka las mezas se ornan de los produktos fabrikados de arina, panes, tortiyas ke sinyifikan azlaha; uvas, igos, la abondansa; granadas la igualdad; azetunas la pas; las datiles la avla dulse.

Kerido primo Yusuf, te rengrasio de alma i korason de apartar tiempo por ambezarmos i darmos los detalyos interesantes konsernando la alegria i la unidad de muestra Fiesta de Sukot.

 HAG SAMEAH.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın