Dos personajes ke resivieron el Premio Nobel

Fue reelmente un evenimiento kuando el juri ke desida de distribuir los premios de Nobel desidio de dar el Premio de Literatura 2016 al kompozitor i muzisyen Bob Dylan. El no es un eskrivano. Ma kreo ke es un poeta ke sus poezias son konosidas por milyones de amantes de su muzika. Ya savemos ke mizmo si no es muy kolay, ay siertos poetas ke resivieron el premio Nobel de literatura. Ma se save ke Dylan es el primer ke reusho de resivir este premio kon sus kantikas ke son poemas.

Dos semanas antes eskrivi siertos rekuerdos sovre Shimon Peres ke fue prezidente del estado Djudio. I unos kuantos dias dospues de Rosh Ashana tuve la posibilidad de vijitar el Konsulato Israelyano kon el prezidente de muestra komunidad Itshak Ibrahimzadeh i la sinyora Deniz Saporta para eksprimir muestros sentimientos despues de la disparisyon del nueven prezidente del Estado Israelyano. Tuve el koraje de eskrivir mis sentimientos en Judeo-Espanyol. Eskrivi en esta lingua porke refleta la kultura de muestra komunidad. Kero partajar estos sentimientos:

Ya savesh ke kada anyo kuando se deklara los viktoryozos ke resivieron los premios Nobel, en el Şalom o en siertos serklos ke se emplea la media sosyal, topamos eksplikasyones sovre los ke son djudios. En eskrivyendo este artikolo miri en el internet kuantos indianos resivieron el Premio Nobel. No topi una lista kompleta ma kreo ke ay muy pokos Indianos ke fueron koronados (taçlandırılmış) kon este premio. Ma el panorama es diferente para el mundo djudio i kada anyo puedesh topar unos kuantos djudios entre los koronados. Devemos de saver ke oy en dia topamos solo en la India una milyarda i tresyentos miliones de almas i solo disiyete miliones de djudios en todo el mundo. Mizmo si el koronado no es mas djudio no es emportante; la emportansa es ke el/eya nasio djudio.

Puedemos dizir la mizma koza por Bob Dylan nasido kon el nombre Robert Allen Zimmerman. Oy en dia tiene setenta i sinko anyos i savemos ke eskojo la relijion kristiana mizmo si no es un fanatiko i se save ke partisipa a siertas tradisiones djudias. Reelmente un alay de djente fueron muy kontentes de esta desizion del juri.

Esto pensando si esto es el muevo kamino mizmo el kompozitor i kantador ke es orijinario de Canada, el famozo Leonard Cohen puede ser un otro anyo kandidato para el premio Nobel. Estos anyos dalkavo tuve la posibilidad de oyir mas frekuente este muzisien talentuozo (yetenekli). Esto asperando kon despasensya (sabırsızlık) la aparisyon del muevo CD de este grande artisto.

En felisitando al muzisien Bob Dylan, oguro la mizmo reushita a Leonard Cohen.

 

“Onoravle Prezidente,

Esto muy emosyonado en eskrivyendo estos biervos aki despues ke mos desho la buena vida.

Antes i durante su prezidensya tuve la onor de vijitarlo munchas vezes komo prezidente de la Komunidad Djudia de Turkiya. Reelmente kada vez fuimos resividos kon onor. La okazyon la mas emportante fue su vijita a muestro pais. Tuve la onor de segirlo a Ankara i despues resivirlo en la famoza sinagoga de Neve Shalom. Kon su prezensia todos los miembros de muestra komunidad fueron empresionados.

Prezidente, malgrado ke era uno de los fondadores del estado Djudio, paso toda su vida para ke la paz reyne en el Medio Oriente. Mizmo si ay siertos sirkolos antisemitikos ke no pensan de la mizma manera, reelmente el premio Nobel ke resivio era meresido i su vida i sus ideas fueron el refleto de esto.

Ke su alma repoze en paz.

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın