Mez de Elul – Mez de las Piadades

Sr. Rav Adoni mos konto el mez de Elul, para azermos profitar de su importansa. Vos invito a meldar lo ke mos mando eskrito de su mano. Le suetamos Anyos Buenos i lo rengrasiamos sinseramente...

Mez de Elul – Mez de las Piadades

Los diyas de enverano pasaron, aparejos por el invyerno empesaron. Diyas de el mez Elul, los diyas ultimos de el kalendaryo Judio. Diyas ke esperamos la anyada mueva, ke va empesar. Los diyas de el mez Tishri, los diyas temerozos de Rosh Ashana i Yom Kipurim. Diyas de rendermos kuento si mos komportimos korektos verso El Kriyador i verso las personas. Los diyas de Elul son diyas de azer un egzamen de konsensya de muestro estado moral. Si kometimos alguna kulpa verso El Todo Potente o verso alguna persona, paryente, serkano o kompanyero, devemos de demandar perdonansa en primero a El Kriyador i, despues, a la persona enverso kuala no mos komportimos komo deviyamos komportarmos. El Kriyador, kon sus buendades, mersedes i sus piadades, mos apareja la Teshuva: Tornar a el kamino derecho i ser personas korektas.

Ke mos embeza a mozotros la Teshuva? Arepintirmos de la kulpa ke izimos i entender muy bien ke estavamos en el yerro i no repetarlo mas.

Muy bien. La Teshuva ke es muy valoroza, ande la puedes toparla? El Kriyador mos dize, mezo Moshe Rabenu: Esta enkomendansa nombrada Teshuva, no esta ni en los syelos, ke es imposivle de alkansarla, ni en el otro bodre de la mar, ke es muy difisil de ayegar a tomarla. Muy fasil, keridos ermanos: En muestra boka i en muestro korason. Kon tener buena veluntad, la puedemos alkansar i aplikar. Devemos de tener una buena veluntad de bivir en pas unos kon otros, de bushkar la trankilidad en muestras moradas. Komo vimos en el livro de el profeta Yermiyau: El savyo doktrine i embeze la sensya a ken no la save, i el baragan aga mantener la Ley i la Djustisya. El riko aga tsedaka, bienfezensya, a ken es de menester, komo guerfanos i bivdas, komo ago yo kon vozotros, dize El Kriyador.

Rogamos a El Kriyador ke mos de vidas largas, kon salud buena. Los anyos van pasando.

Avar katsir kala kayits, dize Yermiyau, el profeta.

El tyempo de la rekolta paso i el enverano ya eskapo. Sigun es el mez de Elul la fin de el anyo, la persona, kuando avanso sus anyos, remarka en si trokamyento. El sol no es akel sol i el ayre no es akel ayre ke konosiya en su mansevez. Ya vino la ora de entender ke el sol kema i la piedra es muy dura. A poko a poko, deve azer trokamyento en su bivir, aserkarse a El Todo Poderozo, kada diya rogar por su salud. Tsedaka i orasyon lo aze bivir a la persona orozo i venturozo.

Ke nos empese la anyada mueva kon sus bendisyones i El Kriyador mos ayege a munchos anyos kon salud buena, pas i repozo.

Rav Yuda Adoni / Estambol

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın