Un ombre ke aze todo

Silvyo OVADYA Köşe Yazısı
21 Eylül 2016 Çarşamba

Por la primera vez, sesh-syete anyos antes, tuve la posibilidad de renkontrar en Estanbol unos kuantos dirijentes de una (porke no me esto akodrando de ke sivdad vinieron) sivdad de la India. Tuvimos este tyempo el plazer de avlar i diskutir kon eyos.

En nuestro pais, las vakansas las mas frekuentes para los ke lavoran son las dos semanas de las fiestas muzulmanas (La fiesta de Ramadan i la fiesta del kodrero - Korban); i esta fiesta tuvimos la posibilidad de vijitar la India en diez dias. Un pais ande moran un alay de djente (la populasyon es serka de una milyarda i dozyentos milyones de almas). Ya se ke este viaje no vos enteresa ma vos va avlar sovre la Sinagoga Judah Hyam ke se topa en Nueva Delhi.

Antes del viaje ke fue organizado en muestra komunidad o los partisipantes eran miembros de muestra komunidad; telefoni al Sentro de la Komunidad para topar el kontakto de los Djudios Indianos; me dyeron el adreso de una otra komunidad. I los ke organizaron el tur telefonaron i se informaron ke vamos azer una vijita al kal. Dia de viernes dospues ke vijitimos un alay de palasyos, antes de tornar al otel mos fuimos a la sinagoga. Mizmo para los gides, era por la primera vez (el indiano komo el turko) ke se ivan a una sinagoga.

Dospues ke la topimos, travimos fotografias delantre de la sinagoga i entrimos aryentro. El Sinyor Ezekiel Isaac Malekar ke es responsavle de todo en esta komunidad i sinagoga mos dyo un livriko sovre la istoria de los Djudios Indianos. I mos konto ke se topan solo dyes famiyas en Delhi. Ya savemos ke ay una komunidad de sinko mil personas en la India ma no en Delhi. I el, ke su profesyon es avokato, se fue a Israel i estudio todo lo ke puede i aze todo lo menester para esta sinagoga i esta chika komunidad. Komo Delhi es la kapitala de la India, en esta sivdad moran mas de dozyentos Israelyanos i personas djudias ke lavoran en las ambahadas. Mizmo este shabat, a la tadre, una partida de la orasion fue meldado por un mansevo ruso ke lavora en este punto diplomatiko. Dospues ke mos konto siertas kozas sovre la komunidad, disho ke no so shohet i moel si no ago todo lo ke se deve. En Israel se ambezo lo ke deve de azer.

No es una komunidad ortodoksa; la puedemos kalifiar komo liberal mizmo reformista.  De vez en kuando mizmo el sinyor Malekar se va para bodas ke se realizan entre un djudyo i un indiano. Una amerikana kon un indiano i kozas asemejantes.

Este dia kon grande alegriya kon los hazanes ke no son de ofisio (el sinyor Niso Machorro – ijo del famozo Hazan Machorro – i el sinyor Moris Salem) entrimos en Shabat. El sinyor Malekar estava muy kontente de ver tanta djente en su sinagoga.

Si vos vash a la India, vos konsejo de vijitar la Sinagoga Judah Hyam.