Ken no tiene de azer kita los ojos de la mujer!

Ken no tiene de azer kita los ojos de la mujer!

anetpase@gmail.com

La manera del komercho se troko en este siglo. Se esta enkontrando a munchos retirados mansevos. Kuando se troka la situasyon del mantenimyento, la adaptasyon es difisil. Sinkuenta anyos antes aviya mas munchos botikaryos. Una persona, afilu estava retirado, ya saliya de kaza demanyanika komo ke se esta indo a su lavoro. Ugradeava a un konosido botikaryo, un poko de sohbet, un chayiziko, hoshgeldin, beshgeldin, pasava el dia. Todos kontentes. Tornando, un poko emplear de la plasa lo ke es menester, una bolsika yena, i a kaza. La mujer pronta, vistida buena, la meza duzudeada, komer un poko i despues vijitar vizinos. Sohbet de los inyetos, inyetas, ermueras o de las esfuegras… ya se topa. Filmos en la televizyon, i despues durmir.

Agora ay esto? No kedo botikaryos en la plasa, a ken vas a vijitar. La komputadora esta el uniko amigo. Facebook inkluye milyones de amigos, amigas, ma un vizino para bever kafiko endjuntos no ay. Los ombres kualo van azer? Un diya al sinema, ya pasa dos oras. Despues?

Ya izieron diyas de retirados mansevos. Dos oras. Despues? Antes eran patrones de sus echos. Agora tyenen una patrona mueva en kaza.

“MIRA KE NO SE KIZDREYE LA PATRONA DE KAZA”! Vos dare un poko de konsejo, kon mil pardones, ke no me kaye a mi puede ser.

• Mira Mansevos! Aze lo ke azes, pasate bueno kon la patrona de kaza. Kuando ay menester, azete shofor, azete guardyan, azete ayudante. La mas importante relasyon, no es la del facebook. Es de los debasho de tus alas.

• Mira mansevos! Ay muncho echo en kaza. Ay de reparar kozikas. La puerta del gardrop. El klavo de la ventana, el ampul, la radio… Ya se topa. Ma korijate. Todo kon karar. Si vas a reparar ke no se bozdeye mas muncho. Mira ke se kizdereya la patrona de kaza.

• Mira mansevos! No te agas timido. Entra al mupak. Aze un gato. No es muy difisil. Ma kuando sale del orno abufado, ya te se abufa i tu onor. Aze salatas, omletes, lo ke te plaze. El mupak da un keyf grande. Ma aze atansyon, arekoje todo, mira ke se kizdereya la patrona de kaza.

• Mira mansevos! Ambezar una lingua mueva avre puertas del mundo. Retirarse es un tiempo bueno para ambezar una lingua mueva. Ademas ke proteja tu meoyo del Alzheimer. Para pensar kozas vaziyas, o al lugar de pudrirte en kaza es una kura buena.

• Mira mansevos! Toma a tu mujer del braso i kamina el mundo. Ke no se vaya en vaziyo, la lingua mueva. Agora ya se esta topando en el internet, biletikos baratikos. Eskoje i viaja. Es bueno para la salud.

• Mira mansevos! No durmas muncho. Aze egzersizes. Ay CD’s de yoga. A poko a poko. Kada diya echa pye a la kaye. Avagar, no ay adjile. Ke dize Dr. Müftüoğlu? Ya saves. Korrer es deranjozo, ma kaminar es nesesaryo.

• Mira mansevos! Ay munchas i munchas kozas dainda de dizir. Aki yo ya eskapi. Ya los topas tu.

Yo lo ke digo es, El Dyo poderozo ke mos de salud a todos, mujer o ombre, a la famiya entera. I estaremos orozos. Retirar no es enviejeser. Es una shans para todos, ke arekojgan sus savidurias, i sus eksperiensas para mantener una vida sana, oroza i produktiva.

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
220