Batya Natan

La avyertura de muevo de la Iglesya Bulgara

Diya de alhad estavamos en Balat para la avyertura de la Iglesya Bulgara Stevi Stefan. La iglesya de fierro ke fue fraguada en 1895 en Viena i ke fue transportada kon vapores chikos al Kuerno de Oro (Haliç) i despues montada kon vidas komo un lego. Ma un LEGO bastante grande. Savemos ke esta restorasyon fue realizada por la Munisipalidad d’Estanbol. I gastaron mas de kinze milyones para esta restorasyon. El primer ministro de la Bulgarya el Sinyor Borisov, el Prezidente Turko Erdoğan i el primer ministro Yıldırım estavan prezentes en esta seremoniya. Aviya tanta djente ke no reushimos a entrar a la iglesia. Era la avyertura de la Iglesia sin vijita a la iglesia.

Esta restorasyon era muy emportante para el estado turko. Porke sus dezeos es de restorar ovras de los non musulmanos en Turkiya i de ver la restorasyon de las meshkitas en diferentes payizes de la Evropa. Por egzempyo estan muy kontentes de saver ke la grande meshkita de Sofya fue restorada por el governo Bulgaro. En su avla el primer ministro Yıldırım mos dyo a entender ke el Govyerno i la Direksyon de las Fondasyones dyo atras a las167 fondasyones de las minoridades relijiozas mas de 1000 immobles (bina) o kampos (arsa) dospues de la mueva ley. El primer ministro Yıldırım i el prezidente Erdogan en sus avlas sinyalaron la atitud pozitiva de los Otomanos i de los Turkos kon los kristyanos i djudios ke bivyeron en estas tierras. I sinyalaron ke keren el mizmo komporto de los Evropeos.

Es djusto ke oy en diya ay problemes seryozos kon las meshkitas en las sivdades evropeas. Devo de sinyalar ke solo en Alemanya se topa mas de trezyentas meshkitas i la Turkiya embiya el personel de estas meshkitas, djente ke no konosen las kostumbres ni la lingua del payis. I a la fin dyeron karar ke syertas personas van a tener la posibilidad de estudiar la teolojia muzulmana en una universidad de Alemanya. I este modo el problem de lingua i de konoser las kostumbres alemanes van a ser rezolvadas.

Es djusto ke los turkos no reusheron a konvenser la Gresya a fraguar una meshkita en Atena. Ya savemos ke no egziste ni una meshkita en Atena. Ma de otra parte los Turkos no permeten ke los kristianos fraguen iglesias en Turkiya. Un sierto tyempo en Alanya aviya serka de kuarenta mil Alemanes, lo mas muncho retretados, i keriyan una iglesia. Kreo ke no reusheron a tomar esta permision.

Bendicho el Dyo, esto no fue el kavzo por los djudios. Porke vemos ke los kales de Neve Şalom (1951), Bet Israel-Şişli (1953), Caddebostan (1953), la sinagoga Ohel Yaakov de Burgaz (1968), la Sinagoga Bet Yaakov de Heybeli (1956) i la Sinagoga de Shaar Ashamayim de Göktürk/Kemerburgaz (2006) fueron fraguadas despues de la fondasyon de la Republika. Las otras ke son mas antiguas fueron solo restoradas en esta epoka i sin problemes muy importantes.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın
509