El Filmo del Senarista Direktor Rama Burshtein

Through The Wall (Ebreo)  “Bodoslama”

2016 Ophir Awards (Israel)

Tuve la suerte de apresiar el filmo presentado por: İSTANBUL KÜLTÜR SANAT VAKFI (İKSV)

36. İSTANBUL FİLM FESTİVALİ  5-15 Avril 2017.

El filmo ke gano premios de mijor Senario (Rama Burshtein), mijor aktrisa (Noa Kooler). mijor kostum, es una produksion (Norma Produktions) de Assaf Amir.

Rama Burshtein avia resivido el premio internasional kon su primer filmo: FILL THE VOID. La senarista avia kritikado las tradisiones infleksivlas del Hasidismo Judaiko. El sujeto ke abordo tuvo un sukseso mondial.

El filmo de kontinuasion interesante, THROUGH THE WALL, ke difisilmente pude obtener un bilyeto refuzado, despues de azer una kola de media ora, me dio satisfaksion.

Una vez maz Burshtein uza el KAZAMIENTO i se sirve de la UMOR, komo un instrumento, komo si era la kontinuasion del primer filmo, ke no avia visto.

Mical (Noa Kooler), aktrisa inkomparavle, en el sentro planifika metikulozamente los detalyos de su proprio kazamiento.

Mujer muy desidada a kazarse, trasa su program, su tiempo, su punto de vista i su estoria...

Rezerva el salon antes un mez, aze imprimar las kartas de invitasion, kree al mirakolo komo una buena Judia i desida por la data: El 8en dia de la Fiesta de las Luzez: HANUKA - va ser un dia spesial.

Malgrado ke es despartida por su novyo, antes un mez, Mical la futur novya, una vez desidada por la data, konsulta una kazamentera ke le traye munchos kandidados hasidimes i otros, para ke pueda eskojer su novyo antes del dia d’alkavo de Hanuka, dia de su kazamiento.

Entretiempo sin piedrer esperansa i kreensia al Dio, komo una buena Judiya, aspera el mirakolo de enkontrar finalmente, su espozo. Alkila una kaza tambien, la duzudeya, la arregla, desida de ayunar el dia de su union sakrada.

La vemos a Mical el dia de la seremonia, kon su shehina de novya, bien makiyada, su djugo perfekto, fostan de novya luzya, asperando un novyo (un mirakolo) en el salon yeno de invitados i SOLO MANKA UN NOVYO...

Esperando ke puedesh tener la posibilita de ver el filmo, me permeto de guadrar i no kontar la fin del filmo...

Felisito tambien el Direktor de Fotografia: Amit Yasour.

Editor: Yael Hersonski.

Muzika: Roy Edri 

Kon: Noa Koler, Amos Tamam, Oz Zehavi, Irit Sheleg, Ronny Merhavi, Dafi Alpern, Oded Leopold, Udi Pers, Jonathan Rozen, Odelia Moreh-Matalon, Erez Drigues.

Esto sigura i espero ke van a kontinuar a produsir para resivir muestras palmas.

MUNCHAS GRASIAS!

 

 

İLGİLİ HABERLER

Siz de yorumunuzu yapın

Tüm Yorumları Görün
Yorum Yapmak için üye girişi yapın! Yorum yapabilmek için üye girişi yapmanız gerekiyor...
Üye Girişi yapmak için Tıklayın