Entornada del amor de su marido i de la profunda kerensya de sus serkanos, paryentes i amigos

Sara Benzon Ruso

serro sus ojos por syempre, komo se amata una kandela, aklarando su deredor fin el ultimo reflo.

Una esperansa loka mos izo refuzar asta la fin la posivilidad de su dezaparisyon, ma el milagro no se kumplio, el mal fue mas fuerte ke muestro dezeo.

Eya mos ambezo munchas kozas ... mos ambezo la dinyidad de sufrir sin un djemido ni una kesha, mos ambezo a ser fuertes en la dolor, a no revoltarmos delantre "lo inevitavle", todo en luchando fin el de alkavo momento.

Eya mos ambezo la noblesa del silensyo en syertas sirkunstansyas, del ayudo echo en la kayades i del merito de ser intelijente i savida sin vana ostentasyon.

A Lazar, Nurika, Lydia, Renée-Jeanne i Natali... al Dr. Elie Behmoiras i a todos sus amigos i keridos, la ekspresyon de muestra profunda amistad.