Kuatro - sinko kazales  fueron  parsyalmente destruidos serka de Elazig a la sigida de un seizmo de magnitud “6” ke provoko la muerte de 51 personas i desho detras de el munchos  ferridos .

El Primer Ministro atribuo la muerte de las viktimas al fakto ke munchas moradas eran fraguadas kon “kerpiç” (tyerra mojada i sekada) , materyal de muy flaka rezistensya. Ekipos del Kızıl Ay akudyeron lo mas presto posivle i empesaron immedyatamente a salvar los ke kedaron bivos debasho las ruvinas i a direjir los ferridos al hospital el mas serkano.

Los kazalinos arrankados a sus eshuenyo muy temprano, a las kuatro de la manyanika, resivyeron mantas para kuvrirsen ansi ke komidas kayentes.De mezmo tyendas fueron montadas i chikos sentros sanitaryos kreados sovre el lugar mizmo de la desgrasya.

El Dyo ke se apiyade i mande pasensya a los ke pedrieron serkanos en esta terrivle katastrofa....De mezmo mos esforsaremos todos a ser konsyentes de los peligros ke mos asperan a kada  kanton de kaleja i mos akavidaremos a ser prontos a venserlos i no a ser vensidos por eyos.