Sovre la piedrita del Prezidente Navon

Silvyo OVADYA Köşe Yazısı
11 Kasım 2015 Çarşamba

El 6 de Novembre piedrimos el sinken prezidente de Israel el Sinyor Yitzhak Navon. Es vedra ke no era mansevo. Ma teniya una  emportansa en el mundo sefaradi. El fue el primer Prezidente Sefaradi en la istoria d’Israel. Nasido en Yerushalayim, era el ijo de un padre orijinario del Imperio Otomano ke emigraron a Yerushalayim en los anyos 1640; i de una madre orijinaria de una famiya Kabalista Marokana ke emigro a Yerushalayim en los anyos 1740. El dospues el liseo estudio en la Universidad Ebraika ande estudio la lingua Araba i lavoro sovre los Estudios Islamikos. Dospues siertos postos politikos en el anyo 1978 fue elijido prezidente de Israel por la Knesset. El era el primer prezidente en el dover kon kriaturas chikas. Vos kero akodrar ke el se kazo en el 1963 kon la psikologa Ofira Erez ke murio en el 1993.Tuvieron dos kreaturas; sus ija Naama i sus ijo Erez.

Tuve la oportunidad de konoser el Prezidente Navon en el anyo 1989 en Israel kuando el Morit organizo por la primera i de alkavo vez el Kongreso del Djudaizmo Turko. El Sinyor Navon ke dio apoyo toda su vida para el mantenimiento de la kultura  sefardi  estava prezente en esta konferensia reelmente muy emportante ke turo kreo sinko dias. El avlava el djudezmo. Komo konosiya muy bien el folklor sefardi eskrivio dos musikales bazados sovre el folklor Sefardi: Romancero Sefaradi (1968) i Bustan Sefaradi (1970). Estos dos muzikales tuvieron un sukseso muy emportante en el Habimah (el Teatro Nasional d’Israel ke se topa en Tel Aviv). El es el autor del livro “Sej dias i siete Puertas” (1979) ke es una lejenda sovre la reunifikasion de Yerushalayim.

Kuando era prezidente,  tuvo relasiones muy entimas kon el Prezidente Enver Sadat de Ejipto. I mizmo fue el primer ombre de politika Israeliana ke vijito el Ejipto.

Komo fue elijido muy mansevo komo prezidente i era muy amavle fue elijido a la Knesset. Mizmo puedia ser el lider del Partido de los lavorantes. Ma no kijo. Fue Ministro de la Edukasion i de la Kultura. Dospues de este posto en el 1996 dospues ke la Knesset adopto una ley ke desidio de kreer una Autoridad Nasionala del Ladino para propajar al seno del puevlo el konosimiento de la kultura djudeo-espanyola en todas sus formas; promoviendo a este efekto la envestigasion de esta kultura, su ensenyansa; i su difuzion, entre otras en los medios de komunikasion. El Ministro de Kultura el Sinyor Zevulun Hamer desidio de nomar el V Prezidente del Estato el Sr. Navon komo prezidente; i el Sinyor Moshe Shaul el direktor de la revista Aki Yerushalayim komo vise-prezidente. Esta Autoridad realizo munchos projektos kon la prezidensia del Sinyor Yitzhak Navon. I es solo este anyo ke la Sinyora Tamar Alexander tomo la prezidensia de esta Autoridad.

Para eskapar mi artikolo es en el anyo 1999 kuando era prezidente de la assosiasion Fakirleri Koruma una noche ke organizimos un paseo kon un barko (tekne) muy grande kon dozyentas personas i tuvimos la oportunidad de ser endjuntos kon el Sr Yitzhak Navon i la Sinyora Zali Detoledo ke era muy serka del Sr Navon i era Atashe Kultural d’Israel en Turkiya. Pasimos una nochada yena de alegria.

El Sr Navon no era komo un prezidente; el era un ombre muy modesto; ombre del puevlo…  Dospues de su muerte meldi dos artikolos ke partajan esta idea.

Ke su alma repoze en paz…