Mishpatim

Rav Yeuda ADONİ Köşe Yazısı
19 Şubat 2020 Çarşamba

I estos son los djuisyos ke ordenaras delantre de eyos. En le perasha Mishphatim meldamos los djuisyos ke nos ordeno el Todo Poderozo despues ke resivimos los dyes komandamyentos. El komentaryo de Rashi eksplika este verseto dizyendo: Komo los dyes komandamyentos fueron dados en el monde de Sinay, la perasha enpesa kon el sujeto de “syervo Ebreo, kuando kompraras syervo ebreo, sesh anyon sirvera, i en el seteno saldra en libertad de baldez”. En el primer komandamyento dize: Yo so tu Dyo ke te kiti del esklavaje de Ayifto dunke tu deves ser esklavo del Kriyador i no de las personas. Komo el diya de Shabat nozotros repozamos i damos testimunyo ke el Kriyador kreo el mundo en sesh diyas i el diya seteno, fue un diya de repozo ansi el esklavo ke fue vendido deve de lavorar sesh anyos i al seteno deve tornar a su libertad. La perasha trata por una persona ke se akometyo de azer un rovo, i el tribunal lo vendyo para ke pueda pagar su rovo. Dunke, de aki se entyende ke no tuvo la posibilidad de pagar el rovo ke se akometyo de azer. La Tora nos enkomenda: En esta manera un kavzo a esta persona no se deve de konportar komo esklavo; i el es un ermano nuestro, deve de azer lavoros ke no es un ensulto para el. Azerlo lavorar el dia i no la noche despues ke kompleto sus sesh anyos se deve de dar su libertad. Este sujeto vyene a enbezar a nozotros, los ijos de Yisrael estuvyeron esklavos a Paro. El Kriyador nos kito de Ayifto i nos dyo a nozotros la libertad. Dunke nozotros somos esklavos del Kriyador i no de las personas.

 

 

 

Siz de yorumunuzu yapın

Tüm Yorumları Görün