Ke diya de Alhad

Silvyo OVADYA Köşe Yazısı
19 Şubat 2020 Çarşamba

Diya de Shabat fue ovligado de ir a la Ada antes de las eleksyones del Anadolu Kulübü. La noche estava aya, i komimos kon todos los dirijentes ke estavan en la administrasyon i ke van a tomar lugar en la mueva administrasyon. El tyempo no estava muy kaynte,  ma komo las kamaretas del otel estavan bastante kayntes no fue un problem. A la demanyana muy presto kon el motor de la Büyükada a Bostancı i kon la araba me fui a tomar la musafira ke teniyamos. La Sinyora Profesora Marie Christine Varol. I mos fuimos a la eskola ande se realizo el Dia Internasyonal del Ladino. Estava pensando ke esta aktividad era la sola aktividad en la eskola. Ya se ke el mizmo diya aviya en un otro lugar una bat-mitzva o un bar-mitzva; en la eskola una Seremoniya para los ke partisiparon a los Djugos de los Makabiyates. Despues esto vyendo syertas kriaturas kon sus paryentes: siguro ke es sus derecho, la eskola organizo un diya para azer konoser la Eskola a las kriyaturas i a sus paryentes. Kaminando de la otra parte me disheron ke en esta sala ay el Klub para los mansevos ke van azer sus Bar-Mitsvas i Bat-Mitsvas. Aviya mizmo un grupo ke vinyeron para el folklor. Ke rikeza. Mos paresyo ke ivamos a ser solos en la eskola. Realizimos despues lo ke se aze en muestra eskola kada fin de semana.

Mizmo oy (lunes a la tadre) no se kuantas personas asistyeron a este diya. Ya se ke a lo manko vente personas ke pagaron sus paras no vinyeron. De la demanyana el salon de abasho del auditoryum estava kompletamento yeno. Ma no el balkon. Es djusto ke una organizasyon ke empesa a las onze de la demanyana i ke se eskapa a las sesh de la tadre no es muy fasil de segir esto todo. Vide mizmo syertos amigos ke salyeron a la kaye para kaminar a lo manko medya ora mizmo si todas las aktivitades eran bastante atraktivas.

Kuando envitash una persona ke vos va avlar, no vos plaze si avla muncho, o poko o si, no es muy enteresante lo ke esta kontando. Ya vimos esto. El anyo pasado Marie Christine Varol estava en Estanbol i la aviamos envitado al Diya Internasyonal del Ladino. I si una profesora komo eya se topa en el salon deve de ser envitada para ke avle. I avlo una maraviya. No so una otoridad para kritikar una profesora. Ma se ke kuando uno/una avla i es muy enteresante i si todos la oyen kon grande atansyon es muy enteresante. Kuando despues ke realizimos el diya en la primera seduta les demandi a ken pensash envitar el anyo ke vyene todos disheron sin ezitasyon: Marie Christine Varol. I la envitimos. Los ke no la sintyeron el anyo pasado estavan muy kontentes de pueder sintir una avla tan enteresante. Mizmo los ke la sintyeron el anyo pasado.  Marie Christine, te rengrasyamos por tus esforsos i por la avla ke mos prezentates.

Antes de eskrivir mi artikolo demandi a Karen kualo estan eskrivyendo en el Şalom. Me disho ke los ke eskrivyeron, el sujeto era sovre el Diya del Ladino. I dishimos ke este numero deve de ser dedikado a este diya kon las fotos tomadas por Alberto Modiano.

Reelmente no aviya nada de kritikar. Sirvyendo la komida en supito Meir, el gizandon de Robelyu, me disho ke se olvidaron la meatad de las “koftikas de prasa” en el mupak en Bostancı. I syertas personas estavan demandando “ande estan las koftes de prasa”. Avlimos kon Meir i disho ke las va sirvir en el “gute”. I dishe a Karen: dize al publiko ke komo el volum de Meir es bastante ancho  kuando no topo lugar para asentarse en el minibüs echo afuera una kaldera i esto era las “koftes de prasa” (no es djusto esta istoria, era para tapar una falta) – i reelmente las koftes fueron servidas en el gute.

Para eskapar, kuando komimos la komida de midi la banda de muzika (bando) de la Munisipalitad de Beşiktaş ke lavoraron mas de un mez i se ambezaron serka de dyes kantikas (melodias) en djudeo -espanyol mos tanyeron durante una ora estas kantikas. Syertos disheron ke era una maraviya, i siertos disheron ke no era una buena idea de azer tanyer estos muzisyenes en un lugar serrado. Grasyas al chef de la banda de musika Kenan por sus esforsos. Esto pensando ke semana puedo trayerlos a la kaleja delantre el Museo Djudio para ke tanyen estas kantikas en la kaye.

   Vos va kontar otras aktivitades de este diya en unas kuantas semanas si no se kontaron.

 

Siz de yorumunuzu yapın

Tüm Yorumları Görün