Las Sinagogas de Muestro Payis; livro publikado por el Şalom

Silvyo OVADYA Köşe Yazısı
22 Ocak 2020 Çarşamba

Ay dyes anyos ke el Şalom publiko un livro maraviyozo de dos volumes sovre las Sinagogas d’Estanbol i de la Anatolia i Trakya. Reelmente los Djudios bivyeron en kada sivdad del Imperio Otomano i de la Turkiya los tres mil anyos dalkavo. Antes ke sea prezidente de la Komunitad Djudia de Turkiya (2004-2010), tenia la intension de realizar un livro asemedjante i Moris Levi fue el ke realizo este proyekto kon el Şalom, lavorando kon İzzet Keribar (fotografias); Naim Güleryüz (istoryano – para los tekstos); Joelle İslamoğlu para la kreasyon del livro. Publikaron el livro en Turko i en Ingles espantandosen del tiraj del livro. I en poko tyempo el livro en Turko se eskapo. I ay anyos ke no puedemos prezentar un livro asemejante a una otoritad ke semos achetados. I dimos karar - El Museo Djudio – de publikar por la segunda vez este livro kon las modifikasyones ke se realizaron los onze anyos dalkavo. Reelmente vemos ke muestra komunidad, las otoritades ofisyales, las munisipalitades ni la direksyon de las fondasyones no estavan bastantes enteresados para konservar o restorar estas sinagogas. Ma vemos ke İzzet Keribar, el fotografo famozo, tuvo un echo bastante ancho  para aktualizar el livro. Kuando empesimos a lavorar vimos ke la Sinagoga d’Andirne fue restorada, tuvimos una seremoniya de avyertura en el anyo 2015 kon la partisipasyon de mas de mil personas. I despues organisimos konsertos, ekspozisyones mizmo una boda maraviyoza en esta sinagoga. Savemos ke en 2012, la restorasyon de la Sinagoga Magen David de Gaziantep fue kompletada i malorozamente la seremoniya de inogurasyon fue realizada solo los diyas dalkavo del anyo 2019. Por los ke no konosen i ke no saven, la Sinagoga de Kilis serka de Gaziantep fue restorada por la Direksyon de las Fondasyones i vamos azer todo lo ke puedemos para azer una seremoniya aya.

Ya savesh puedeser ke tenemos una Sinagoga en Bergama. Anyos el mayor me telefono para topar un apoyo material. Le propozi munchas kozas kon el ayudo de los Bergamalis ma no le plazyo. Kreo ke es la Munisipalidad ke realiza esta restorasyon. Savemos ke anyos antes las bestias estavan en la sinagoga komyendo pajas. La restoraron. Savemos ke la Sinagoga d’Abudaram i la Sinagoga Mayor no estan en este livro. Es en eskrivyendo este artikolo ke esto demandando si la Sinagoga Ezger de Hasköy se topa en este livro. Malorozamente no esta en este livro i embiyi un mesaj a İzzet Keribar para informarlo.

Ya savemos ke la Sinagoga de Abudaram i la Sinagoga  Mayor no estan  en el livro. Es dospues de los anyos 1990, mizmo 2000 ke empesimos a dar importansia a muestas antiguas sinagogas. Si no savesh ay fin de semanas ande entre kinyentas i mil personas vijitan la sinagoga d’Andirne. Reelmente es un mirakolo. Estamos azyendo grandes esforsos para ke muncha djente vijite muestro muzeo ma kreo ke es mas fasil de topar vijitadores para la Sinagoga d’Andirne ande miles de personas vijitan la meshkita de Selimiye.

 

 

Siz de yorumunuzu yapın

Tüm Yorumları Görün