kanada REklam

Diya Evropeo de la Kultura Djudia

Diya Evropeo de la Kultura Djudia

Ay 21 o 22 anyos en syertos payises de la Evropa, i 18 anyos en muestra sivdad ke fiestamos el diya Evropeo de la Kultura Djudia. Es djusto ke esto eskrivyendo en Judeo-Espanyol la presentasyon de este diya. Ma el buto es de azer konoser los lugares komunales ke apartyenen a la Komunidad Djudia a la populasyon Turka Musulmana o non-Djudia porke no es muy kolay de vijitar estos lugares kuando les vyene la gana. Ya savemos ke kon las prekosyones de seguridad no temenos la posibilidad de achetar toda la djente en una sinagoga. Porke komo ya bivimos evenimyentos teroristikos tenemos un dubyo kon los ke vyenen a la sinagoga. Ma en este diya tenemos todas las puertas avyertas. Estamos organizando este evenimyento en el muzeo ma kon el lavoro de un grupo de dammas enkavesadas por la Sinyora Eda Levi. Ay mezes ke lavoran para reushir este diya.

 En este diya organizan dos konsyertos. El primer por Karen Şarhon i İzzet Bana (Los Pasharos Sefaradis) ke van a kantar los Tangos Sefardis; el segundo konsyerto va ser el konsyerto de Cako Taragano kon sus amigos ke mos van a kantar kantes liturjikos.

  Vamos a segir el Sinyor Yusuf Altıntaş ke mos va informar sovre syertos sujetos djudaikos. Süzet Sidi mos va avlar sovre el menester de la edukasyon del Olokosto. En el mizmo diya el Konsul Onoraryo de Portugal en Estanbol, el Sinyor Aron Nommaz mos va avlar sovre su livro. Ay unos kuantos anyos ke el sinyor Nommaz eskrive syertos livros sovre Donna Gracia Nassi, Joseph Nassi i a la fin sovre el vapor batireado en la Mar Preta por los Rusos ande serka de ochosyentas almas estavan i ke se muryeron en las aguas yeladas de la Mar Preta. Vamos a ver lo ke mos va kontar.

  En el mizmo diya tenemos una presentasyon sovre la Lingua Judeo-Espanyola i la enfluensya del Turko sovre muestra lingua. Kreo ke va ser muy enteresante. Son Süzet Herman, Şeli Gaon i yo ke vamos a tratar este sujeto.

 Lo ke les plaze a la djente mismo a muestros djudios es la Seremonia de Boda ke organizamos kada anyo. Ya saven ke no es una boda verdadera ma muestros djudios vyenen, se asentan al primer rango komo si era la primera vez ke van a ver una boda djudia!

 En el mizmo diya un grupo enkavesada por la Sinyora Karel Valansi van a dizir “Ven i mos konoseremos (Gelin tanış olalım)”. Es un lavoro ande syertas personas dan repuesta a las kestyones de la djente ke keren demandar a un djudio o mizmo keren meldar en un livro sovre el Djudaizmo…

  Los ke van a vinir tienen la posibilidad de komer komidas sefaradis prezentadas por “la Casa”. Solo esto no es debaldes. Los ke keren komer van a pagar para pueder komer. I ay dos presentasyones sovre las komidas Djudias. La primera va ser una presentasyon de las Izmirliyas. Las ke eskrivyeron un livro sovre las komidas sefaradis de Smyrna. I la Sinyora Gilda Koen, otra İzmirliya ma ke es kazada kon un Estanbolli mos va presentar otras kozas sovre las komidas sefardis. Todos los detalyos los puedesh topar en el internet.

No vos olvidesh vamos a presentar este diya en la televizyon Haber Türk oy kon Jale Kohen Aldiş.

Esperamos ke a lo manko mil i kinyentas o dos mil personas van a partisipar a este diya…

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın