kanada REklam

Una semana muy kargada

Una semana muy kargada

La semana pasada tuve la oportunidad de ir dos vezes a Smirna. La primera vez para la avyertura de la ekpozisyon sovre las Vistimientas Djudias en el Imperio Otomano. Fue una seremonia muy reushida. Kreo ke la mas grande partida de los jurnalistos estavan aya. I este haber aparesyo a lo manko en trenta gazetas i revistas. No se si saven ke esta ekspozisyon fue ekspozada por la primera vez 18 anyos antes. I reelmente no pyedro de su aktualidad. I de verdad, los dirijentes de la Asosyasyon de la Kultura Sefaradi de Smyrna izieron munchos esforsos para realizar esta ekspozisyon. Fui muy kontente de saver ke kada diya entre sesenta i syen peronas vyenen a vijitar la Keila Portugeza ke fue restorada unos kuantos anyos antes.

Vyernes a la demanyana tomi por la segunda vez el avion para irme a Smyrna porke estava envitado a una Konferensya sovre los lavoros Djudaikos i Israel. Es por la tresera vez ke se organiza una konferensia asemejante. La primera era en Konya; la segunda en Bandırma. Esta tresera estava mas enternasyonal porke avia a lo manko 15 akademikos, la mas grande parte Israelyanos ke asistyeron a esta konferensya. Ay munchos anyos ke los ambasadores o konsules Israelyanos no partisipan a las aktividades asemejantes. Ma esta vez el Chargé d’Affairs israelyano Roey Gilad ke se topa en Ankara estava envitado i presento un diskorso enteresante sovre las relasyones Turko-Israelyanas ke no estan en un buen estado estos anyos dalkavo. Esperamos ke se va amajorear. En esta konferensya presenti un lavoro entitulado “De la lingua de las kartaspostales los Djudios Otomanos i Turkos” i ya se ke estash meldando en el numero de oktubre i de este mez en el Amaneser mi artikolo sovre estas kartas. Espero ke en unos kuantos mezes va reushir a terminar el livro ke devo de publikar sovre este sujeto.

 I muestro amigo Metin Delevi ke lo konosesh por sus artikolos ke eskrive en la pajina de Judeo-Espanyol estava en la konferensia para presentar un lavoro sovre el “Antisemitismo; su istoria i sus refleksyones  oy en diya”. No kero azer komentaryos sovre muestros lavoros, ma es emportante de saver ke mas de 105 lavoros sovre los Djudios i Israel fueron presentados en esta konferensia. Agora savemos ke kada anyo mas de syen lavoros de master o de doktorado se estan realizando sovre estos temas.

El mas grande problem era ke no aviya una traduksyon. I los ke vinyeron de otros payises se kedaron solo el primer diya por ke la mas grande partida era en ingles. A los ke organizan les dishe ke deven de organisar esta konferensia el anyo ke vyene en Estanbol i kon traduksyon simultaneo. Este modo todos van a pueder entender lo ke se avla. En dos o tres universidades ay sentros ke se enteresan en sujetos asemejantes. Felisito a los ke organisaron esta konferensia.

Di un titolo asemejante a mi artikolo porke martes me fui a Ankara para una otra konferensia.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın