Hatima Tova i Hag Sukot Sameah

Silvyo OVADYA Köşe Yazısı
16 Ekim 2019 Çarşamba

La semana pasada diya de myerkoles era Kipur. I ay anyos ke me vo a la Sinagoga de Neve Şalom. Es una de las mas konfortavle sinagogas kon todas sus posibilidades. Es djusto ke la Sinagoga es reelmente yena solo la ora de la Neila. Martes empesimos tadre porke la djente no tyenen la posibilidad de vinir presto. Kuando es la orasyon del Kal Nidre i todas las Sefer Toras son en los brasos de los yahides, todos azen sus posivles para ke todos puedan tener una Sefer Tora. I reelmente serka de los setenta o ochenta almas ke se topan en esta ora toman una Sefer Tora en sus brasos.

 Vos avia kontado la semana pasada ke me demandaron si el Museo puediya ser avyerto en este diya para ke la djente tengan la posibilidad de vijitar el Museo despues del Musaf i antes de la Minha. I el museo fue vijitado por sinkuenta o sesenta almas. I estava muy kontente de pueder dar syertas eksplikasyones a los ke kijieron vijitar el Museo. Kreo ke una chika partida de los yahides pensaron ke no es djusto de vijitar diya de Kipur. Devemos de respektar todo modo de ideas si no da dingun danyo a los ke no pensan de la mizma manera. En este diya aviya en la sinagoga un Israelyano. Su famiya orijinarya de Smirna. I el es un antikaryo en Yafo. I entendi ke tyene una otra botika en Yerushalayim. Me konto lo ke esta vendyendo en su botika. I me konto ke ay 20 anyos ke merka de Estanbol megilas de un antikaryo Ermeni ke tyene una botika en Mecidiyeköy i me disho ke merko mas de trenta deyos. Reelmente estava muy triste de oyir esto. Malorozamente no savemos la valor ke tenemos en muestras kazas o en las kazas de muestros paryentes. Las personas venden mizmo las ketubas de sus paryentes o el vendedor las topa en un livro ke se vendyo a un palyaruhadji (eskici). Ay en una otra vendida ke se va realizar este viernes una ketuba del Gran Rabinato de Estanbol de los anyos 1910.

Esto muy kontente ke reushimos a azer una ekspozisyon de Megilat Ester kon mas de sesenta megilas.

 Me esto espantando de azer una ekspozisyon de Hanukiyas. Kreo ke no vamos a topar bastantes Hanukiyas ke son orijinarias del Imperio Otomano o de la Turkiya. Despues ke el ir i vinir a Israel se izo muy kolay kon los aviyones mizmo si azemos una produksyon de Hanukiyas en Estanbol, la mas grande partida son reproduksyones de Hanukiyas Israelyanas. Tengo un livro de “desenes” ande se topan syenes de obdjektos Judaikas. I reelmente kon tantos Djudios Israelyanos i kon tantos turistos Djudios ke vyenen de las kuatro partes del mundo es muy difisil de pueder vender estos obdjektos.

Alhad la noche empesimos a fyestar la fiesta de Sukot. I las keilas azen todo lo menester para resivir los yahides en las mijor kondisyones kon todo modo de pransos. Mizmo los mansevos son enteresados de tomar parte en estas Sukas. Hag Sukot Sameah.

 

 

Siz de yorumunuzu yapın

Tüm Yorumları Görün