kanada REklam

Ke dias un Museo Djudio se puede vijitar

Ke dias un Museo Djudio  se puede vijitar

Dos semanas antes, el Presidente de la fondasyon de Neve Şalom me demando si los yahides ke vienen diya de Kipur al Neve Şalom tyenen la posibilidad de vijitar el Museo Djudio despues del Musaf i antes de la Minha. Reelmente fue una idea maraviyoza. Ya savemos ke los anyos dalkavo en la Sinagoga Ashkenazi se organizan syertas konferensias diya de Kipur. I estas konferensias son segidas por un grande nombre de yahides. I este anyo por la primera vez vamos a organizar el torno del museo. I kreo ke la grande partida de los ke se kedan todo el diya en la sinagoga van a vijitar el Museo.

  Ay anyos ke estamos diskutando sovre lo ke se puede azer diya de Shabat o dias de Yomtov. Anyos antes en un kongreso organisado en un otel relijioso en Israel, en Yerushalayim empesimos a lavorar diya de Shabat. Diya de Shabat, despues de midi avian tres diferentes diskusyones. No se eskrivio, no avia mikrofones. I todos estavan kontentes de este empesijo.

  En New York, un diya de Shabat estava pasando delantre el Museo Djudio en Manhattan i vide ke esta avyerto diyo de Shabat. Imediatamente en el internet miri komo un museo djudio puede ser avyerto diya de Shabat. Vide ke reelmente esta avtyerto. La sola koza es ke no se merka los bilyetos para la entrada este diya. Ya lo estash merkando del internet un diya antes i estash vinyendo al museo sin pagar paras. La sola diferensya era ke la botika del museo era serrada este diya porke no se aze vendidas diyas de Shabat. 

  Tres semanas antes kuando me fui a Paris para los kuarenta anyos de la Asosyasyon de Vidas Largas telefoni a un amigo i le demandi kuantas personas vijitan el Museo Djudio de Fransia (Museo de l’arte i de la kultura del djudaismo) i kuantas personas vijitan el Memorial de la Shoa. Despues vide ke el Museo de l’arte i de la kultura del Djudaismo se puede vijitar mismo diya de Shabat. Dishe ke no es posivle. Demandi al mizmo amigo “komo puede ser ke esta avyerto diya de Shabat?”. Mi amigo me disho ke este museo fue fondado por el Estado Fransez kon la Munisipalitad de Paris (sinkuenta por syen kada uno). I komo no son organizasyones djudias no tienen dingun problem para ser avyertos diya de Shabat i son liberos de ankesar monada. La proksima vez ke me va ir a Paris va azer toda mi posibilidad para kedarme diya de Shabat i vijitar este museo.

Anyos antes los dirijantes del Schneidertempel demandaron de pueder ser avyertos diya de Shabat kon una responsavle ke no es djudia i ke kere lavorar. Azen ekspozisyones i no toman paras. Dunke mi idea es ke no ay dingun danyo si esta kaza de arte i de eksibisyones esta avyerta diyas de Shabat. Para defender una idea kale ser resonavles i djuzgar kada kavzo komo se kere djuzgar.

 Eskrivyendo este artikolo en el komputator en la televizyon avia una novedad ande estavan kontando ke el 6 Oktobre realizaron por la sinkena vez un Festival de Boyoz en Smyrna. Ya savesh ke Boyoz es una komida / un börek sefardi ke es renomado en la sivdad de Smyrna. I la munisipalidad de İzmir durante este Festival ofresyo 15.000 boyoz kon guevos haminados (komo el desayuno djudio) i chay para ke espiden lo ke se estan komyendo. Espero ke vamos azer la mizma koza en Estanbıol kon la munisipalidad ofresyendo borekas de berendjena i de patata kon guevos haminados.

Hatima tova a todos.

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın