kanada REklam

Los 40 anyos de Vidas Largas

Los 40 anyos de  Vidas Largas

Kreo ke era en los primeros anyos de los ‘80, despues ke mi madre pedrio a su marido, mi padre, kada invyerno se iva a Paris a la kaza ande nasyo al lado de su madre ande se kedava mas de dos mezes. I yo de la revista “l’Arche” ke estava sigiendo le demandava de ir a una seduta de “Vidas Largas” para ke me merke un livro de Haim Vidal Sephiha o un otro livro ke fue publikado por la Asosyasyon de Vidas Largas. Unas kuantas vezes partisipo a las reunyones de Vidas Largas ande se avlava de rekuerdos de la vida ke bivyeron en el Imperio Otomano i en la Republika Turka. Avlavan de vez en kuando en fransez i syertas vezes en Djudezmo.

Es esta mizma asosyasyon “Vidas Largas” ke fiesto sus kuarenta anyos diya de Alhad. Unas kuantas semanas antes demandi a Karen ke pensa i me disho ke no puede irse a esta reunion. I di karar de irme porke deviamos de reprezentar mozotros el Sentro Sefardi de Estanbol en este evenimyento bastante emportante. Ir komo? Kon manos vaziyas? No! Dishe a mis amigos ke deviamos de travar una foto kon letras en la mano: “VIDAS LARGAS”. I lo izimos. Despues kada uno eksprimo sus sentimientos para la Asosyasyon i para su prezidente de onor, el Profesor Haim Vidal Sephiha. I me fui al avion kon estos dos kuadros; el primer para la Asosyasyon “Vidas Largas” i el segundo para el kerido Haim Vidal Sephiha. I komo estava envitado a una boda en las Islas tomi el avion a las kuatro de la demanyana para irme a Paris. Tuve la oportunidad de konoser muncha djente ke sinti munchas vezes sus nombres. El sinyor Edmond Cohen ke ay anyos ke aze un program en Judeo-Espanyol en la radio. I ke agora dyo karar de no azerlo porke le kitaron un alay de hohentas. I estava bushkando a uno ke le va tomar este dover. Ya se no es muy fasil de resolver este problem. El sinyor Marsel Hazday ke prezento la nochada, i ke presento al sinyor Edmond Kohen ke mos avlo sovre la Asosyasyon i sovre su prezidente de Onor el Profesor Haim Vidal Sephiha. Aviya muncho tyempo ke no avia renkontrado el Profesor Sephiha. Ma me rekonosio kuando entro al Sentro. Me demando mizmo si no lavoravamos kon Karen Şarhon … Despues de syertas avlas un grupo mos kanto kantes i kantikas en Judeo-Espanyol, mizmo kreo en Haketiya (Haketiya: lingua de los Sefardim del norte de la Afrika ke avlaron un Djudezmo mesklado kon el Arabo al lugar del Fransez, Turko i Grego.). Los miembros eran orijinaryos del Maroco (no todos). I aviya dos dammas ke baylaron en la shena durante el konsyerto.

Avian organizado una “Tombala” en favor de este diya; i kon los dyes numeros ke merki, gani 5 vezes los regalos ofresidos por la Asosyasyon. Kale dizir ke normalmente no es muy kolay de pueder ganar. Ma esta vez tuve “Mazal”. Es djusto ke estavan muy “hovardas”. Dyeron el karar de dar regalos a los ke partsiparon a este diya. Kreo ke dyeron komo “regalos” mas de kuarenta livros. Esto augurando munchos anyos a esta asosyasyon ke durante los mezes dalkavo izo todo modo de publisitad para ke la djente partisipe a esta fiesta.

Ay trenta anyos ke tuve la posibilidad de enkontar el Prof Sephiha en un Kongreso ke se aviya organizado en Israel. Despues lo vide en diferentes okasyones. Ya se ke no es mas mansevo, ma tyene dainda la fuersa de pueder eskrivir i defender sus ideas. Le auguro una vida larga kon salud.

Noche de alhad kuando torni a las tres de la demanyana estava demando si reelmente devia de irme a esta seremoniya? Mi repuesta era SI; devias de ir para partajar sus alegriya.

 

 

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın