Konferensya de Özkök en el Klub Anadolu

Silvyo OVADYA Köşe Yazısı
24 Temmuz 2019 Çarşamba

Era nochada de shabat el 20 del mez de julio ke en el Klub Anadolu ke se topa en la Büyükada (Isla de Prinkipo) el djornalisto muy renomado Ertuğrul Özkök estava envitado para azer una konferensya sovre la demokrasiya i el estado politiko en muestro payis. Los anyos dalkavo esta eskrivyendo unos artikolos leshos de la politika. Es djusto ke de vez en kuando esta echando punchones en sus artikolos. Ma en su konferensya avlo todo lo ke se deve de avlar. Mizmo un sigiente ke estava asentado detras no pudo rezistir i empeso a gritarlo “al lugar de avlar esto todo devesh de eskrivir esto todo en el diaryo ke estas eskrivyendo”. I kon esta birra despues de su avla abandono la konferensia. El moderator ke era un ex-ambasador se inyervo muncho. Ma el sinyor Özkök le disho “desha ke avle, yo so auzado a esto. Mi mujer esta dando reaksyones asemejantes unas kuantas vezes a la semana o al mez. I kuando la djente gritan la reaksyon no es bastante efikache, si alguno lo dize kalmamente puede ser mas efikache.”

Despues el sinyor Özkök avlo mas de 90 puntos sovre la situasyon politika de muestro payis i su avenir. En la sala avia kreo mas de dosyentas personas i la mayoriya fueron empresyonados de lo ke konto. Mos dyo syertos rensenyamentos sovre las muevas anketas realizadas. I mos konto sovre el entereso de la djente kon los intervius realizados kon el sinyor Davutoğlu ex-primer ministro ke esta en preparasyon para fondar un muevo partido. Estava dizyendo ke estos tres reportajes kon Ahmet Davutoğlu fueron dos vezes mas meldados ke el tiraj total de las gazetas en Turkiya.

   Le keria demandar el futuro de la prensa emprimada en muestro payis, ma komo me respondyo a una demanda “de ke esto pensando al lugar de los patrones de las gazetas? Si no tyenen bastantes personas ke meldan sus gazetas es un problem ke deven de rezolver eyos mizmos” I no topi el koraje de demandar otras demandas sovre este sujeto.

   Komo saviya ke el sinyor Özkök devia de vinir,  estava pensando lo ke devia demandar? I djueves a la demanyana tomando el katamaran empesi a kontar kuantas personas avian merkado una gazeta para meldar. Era una desgrasia; si konti djusto kreo ke solo 14 personas sovre mas de 200 personas avian merkado una  gazeta. Vos aseguro ke no era esta situasyon unos kuantos anyos antes. Komo la mas grande  partida de las gazetas no son liberas i ke no pueden eskrivir todo lo ke pensan  el rezultado es komo esto.

   A la fin de esta konferensia la djente estavan kontentes de oyir ke la mueva politika ke va ganar es la ke va ser mas kalma i ke no va atakar el adversario. Porke el puevlo ya se enfasio de las avlas ke se realizan en gritando i en ensultando.

 

 

 

 

 

Siz de yorumunuzu yapın

Tüm Yorumları Görün