kanada REklam

Sovre dos livros

De vez en kuando vos esto kontando syertos puntos sovre unos kuantos livros enteresantes ke topo la posibilidad de merkar i de meldar porke syertos livros se venden tan karo ke mizmo si tengo la posibilidad de merkarlos no los esto merkando mizmo si estan eskritos en judeo-espanyol i ke devo de meldarlos.

El primer livro sovre kual vos va avlar es un livro sovre los rejistros de la populasyon djudia de Gelibolu, kazal de Çanakkale. Es un akademiko ke se topa en Çanakkale, Fuat Durmuş ke mos embiyo sus notas sovre este rejistro. I reelmente es muy enteresante de ver ke tantos djudios bivyeron en este kazal. Ke no vos pareska ke este livro es eskrito solo en turko. Lo izimos en dos linguas; en turko i en inglez. Mizmo todo lo ke esta eskrito en el rejistro puede ser transladado al inglez kon un diksyonaryo de una oja ke se topa en el livro.

Gelibolu es un kazal ande se topava una sinagoga. Ma komo no teniyan una fondasyon, la sinagoga estava enrejistrada ensima de un Djudio del kazal. Ma kuando se muryo, sus ijos ke moran en Israel no kijeron dar la Sinagoga a la Komunidad. No se kualo van azer de este edifisyo abandonado i medyo derrokado. I yo esto siguro ke la munisipalidad de este kazal no les va dar una permisyon para azer una mueva konstruksiyon. Este livro fue publikado kon el ayudo del Sentro Sefardi, del Museo Djudio i el Şalom. Este livro se vende en el Museo Djudio i en el Şalom i el presyo es 40 liras.

  El segundo livro fue eskrito por muestro amigo Metin Delevi ke aze bushkedades sovre el pasado de muestra Komunidad. “Los esportivos Djudios en la Istoria del Spor Turko”. Un sujeto reelmente muy enteresante. Ya savemos ke Delevi empeso este lavoro kon una ekspozisyon ke topo lugar en el Museo Djudio. Metin Delevi en el empesijo del livro mos esta kontando sovre los esportivos i los klobes Djudios en el Imperio Otomano. Mos estamos ambezando la istoria de los Klobes de Maccabi. I vemos ke antes de la republika o en el empesijo de la republika los miembros de las minoridades relijyozas eran los pionaryos (öncü) en todo modo de spores. Mizmo vemos buen karar de esportivos ke reprezentaron la Turkiya en diferentes kompetisyones. Kreo ke el problem el mas emportante en el livro es ke Delevi esta eskrivyendo sovre syertos sportivos ke no fueron muy profesyonales. I este modo puedeser ke ay syertas personas ke no fueron indikados (belirtilmiş) en este livro. Un evenimyento muy enteresante ke topa lugar en el livro: “Las Olimpyades del anyo 1936 tomaron lugar en Berlin, kapitala de la Alemanya Nazista i el propagandisto Nazi Goebbels izo lo ke puediya para ke los Djudios no puedan partisipar a estos Djugos. Ma la Turkiya partisipo kon dos esportivos Djudios a estos djugos”.

  El livro fue publikado por la Kaza de edisyon Libra i el presyo del livro es 80 liras. Lo puedesh merkar en el Şalom o en el Museo Djudio.

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın