La semana de la Fiesta

Silvyo OVADYA Köşe Yazısı
12 Haziran 2019 Çarşamba

No me plaze ich ke aga vakansas antes o despues de un Bayram. Kuando esto dizyendo “bayram” kero dizir, “la fiesta de Ramadan” o “la fiesta del Kodrero”. El primer es tres diyas i medio i el segundo es kuatro diyas i medio. I no ay hayre de la semana entera. En el echo, es la gerra kon todos. Komo kada anyo troka de data, la epoka la mas importante en mi echo es entre los mezes de mayo i de novembre. Los lavorantes ke se van al kazal suyos no keren tornar pishin para lavorar. I un alay de problemas. El Dyo me mareo i tres mezes antes di karar de ir al Kongreso de Erensya ke se realizo en Seattle / Washington. I kuando merki el bilyeto de avion, no avia mirado ke data es el Bayram. I torni alhad a la noche un diya antes. Komo pena (ceza) me alevanti kada noche a las kuatro de la demanyana para pueder avlar kon Estanbol (ay diyes oras de diferensia) kon el echo i kon otros lugares ke asperan mis repuestas. Eskrivi mi artikolo en el telefon i lo embiyi en el tyempo.

Ma ize un yerro. No es mi kulpa. Aviya una konferensia sovre los Djudios de Seattle i demandi al ke mos izo la konferensia. Me olvidi ke teniya serka de noventa anyos. I devo de aklarar lo ke eskrivi. La populasyon Djudia de Seattle es serka de sesenta mil personas i la Komunidad Sefardi kontyene serka de sinko mil almas. I estas sinko mil almas frekuentan las dos sinagogas sefardis.

Ma ay anyos ke los eskrivanos del Şalom no azen vakansas i mizmo kuando estan en vakansas, deven de eskrivir sus artikolos o desinar sus karikaturas. Las solas vakansas son las dos semanas de Bayram. I es por esta razon ke no resivitesh el Şalom la semana pasada i ke vash a resivir el Amaneser la semana ke vyene.

Vos kero avlar un poko sovre la ekspozisyon i el chiko muzeo ke tomo lugar en el Schneidertempel de la Komunidad Ashkenazi. Es djusto ke muestro muzeo kontyene todo lo ke es sovre los Djudios en muestro payis. Sefaradis komo Ashkenazis, mizmo si tenemos dokumentos sovre los djudios Frankos (Italyanos, Fransezes, ets.) I no azemos dinguna diferensya. Si ay el dokumento de un soldado djudio ke estava en la armada i ke tomo rolo en las gerras no es importante si era Sefaradi o Ashkenazi. Ma esto no kere dizir ke no fui kontente ke el Sentro Schneidertempel en su etaj de arriva organizo una ekspozisyon permanente de dokumentos i de objektos ke reflekta la vida de los djudios Ashkenazis en muestra sivdad. Yo fui uno de los primeros ke emprezenti un album de fotografias a lo manko de ochenta anyos ke fue publikado por un editor Ashkenazi muy famozo, Israelovich. Savemos ke entre los editores de kartpostales ay un nombre muy emportante de editores djudios. No solo en Estambol ma tambien en Salonika, en Smyrna, en Andirne, en Kırkkilises (Kırklareli), en Adana i otras sivdades.

La semana ke se avriyo esta ekspozisyon tuve la oportunidad de merkar tres lotes diferentes en las vendidas en el internet ke les interesa. El primer es una publisidad del magazen “Mayer”. El segundo, sovre una fotografia de Yüksekkaldurum kon el pano de la kompanyia komersial “N.B. Brod Draperie Anglo-Turk” i una semana despues topi un diploma de la Aliansa de Hasköy dado a una ija Ashkenazi.

İzel Rozental, ke es responsavle de esta ekspozisyon i es mi amigo va tener todo modo de apoyo de mi parte en este kampo.

 

Siz de yorumunuzu yapın

Tüm Yorumları Görün