kanada REklam

Behukotay

Si anduvyeresh en mis fueros, i guadraresh mis enkomendansas, i las azeresh yo dare vuestra luvya en su tyempo, i la tyerra dara su ermoyo, i el arvol del kampo dara su fruto, i komeresh vuestro pan a la artura, i moraresh siguros en vuestra tyerra, i dare paz en la tyerra i dormiresh i no avra ken vos espante i are kitar las alimanyas malas de la tyerra, i por vuestra tyerra no pasara espada; vos muchiguare i afirmare mi firmamyento a vozotros i andare entre vozotros. I sere vuestro Dyo i seresh mi puevlo. Yo so vuestro Kriyador.

La Tora nos esta enkomendando de aplikar las enkomendansas ke nos enkomendo el Kriyador. El Kriyador nos esta prometyendo ke nos va dar nuestro mantenimyento syempre. “Si anduvyeresh en mis fueros” son los primeros biervos de nuestra perasha, kere dizir: Si vash a ser buenos i onestos i vos vash a enforteser en el estudyo de la ley, vos va dar syempre luvyas de bendisyon. Tambien va pasar la pas entre vozotros. Ke no digash ya tenemos un pan de komer i muncho bueno pero la pas i el repozo nos manka. Por esta kavza, vos esto prometyendo ke yo vos va dar i la paz para ke tengash el repozo. Yo vo estar syempre entre vozotros, no solamente en este mundo tambien en el paradiso. En este mundo vos va dar artura i repozo para ke estudyemos la ley santa, i la aplikaremos, ansi ke tendremos merito de eredar el mundo venidero. A mis enkomendansas guadraresh: este verseto nos embeza, dizyendo la ardor ke devemos de tener para aplikar las enkomendansas, dizyendo kundo me se va fadar de azer tala enkomendansa. Devemos de ser prontos en las enkomendansas i kuando va vinir el tyempo de azerlos si ninguna ezitasyon aplikarlas.

Ansi vos va dar las luvyas en su tyempo; vash a tener syempre la bendisyon del Kriyador, vash a arekojer vuestro produkto. Entre estas todas bendisyones el Kriyador va pozar mi morada entre vozotros. Yo vo morar entre vozotros por el merito ke estash enfortesyendo la ley i afirmando mis enkomendansas, dize el Todo Poderozo.

 

 

 

Siz de yorumunuzu yapın

Tüm Yorumları Görün
Yorum Yapmak için üye girişi yapın!Yorum yapabilmek için üye girişi yapmanız gerekiyor...
Üye Girişi yapmak için Tıklayın